Ўзбекистоннинг биринчи ракеткаси афсонавий Уильямсни мағлуб этди

Кеча, 2 август куни Ўзбекистоннинг биринчи ракеткаси Камилла Раҳимова Торонтода ўтаётган WTA 1000 тоифасидаги National Bank Open турнирининг биринчи босқичида америкалик афсонавий теннисчи Винус Уильямсни ишончли ҳисобда мағлуб этди.

Ёмғир сабабли қолдирилган учрашув 1 соат 29 дақиқа давом этди ва унда Раҳимова икки сет натижасига кўра, 6/4, 6/1 ҳисобида ғалаба қозонди.

46 ёшли Винус Уильямс ушбу мусобақада wild card орқали иштирок этган эди. Бу мағлубият америкалик теннисчи учун кетма-кет 12-мағлубият бўлди. Унинг омадсиз серияси 2025 йилнинг июль ойидан бери давом этмоқда. Учрашувдан кейин Винус Уильямс ўйин ҳақида ўз фикрларини билдирди.

“Биз очиқ ҳавода ўйнаймиз, об-ҳавони назорат қилиб бўлмайди. Аммо мухлислар ажойиб эди. Улар ҳар бир очкода мени қўллаб-қувватлади. Мен эса шунчаки тўпни майдонга тушириш учун курашаётгандим”, дейди Уильямс.

Дунё рейтингида 82-ўринни эгаллаб турган Камилла Раҳимова эса афсонавий рақибига қарши ўйнаш у учун унутилмас тажриба бўлганини таъкидлади.

“Винусга қарши ўйнаш ҳар куни насиб этавермайди. Унга қарши кортга чиқиш имкониятига эга бўлганимдан жуда хурсандман. Бу учрашувни узоқ кутдим. Унинг Марказий кортда ўйнашини билардим. Натижадан қатъи назар, кортдаги ҳар бир лаҳзадан завқ олишга ҳаракат қилдим”, дейди Раҳимова.

Энди Камилла Раҳимова мусобақанинг иккинчи босқичида Чехия вакили Катерина Синяковага қарши кортга чиқади. Беллашув жорий йилнинг 6 август кунига белгиланган. Ҳозирда Синякова WTA рейтингида 36-ўринни эгаллаб турибди.