Ўзбекистонлик спортчиларнинг Осиё ўйинларидаги бугунги натижалари қандай?

Бугун, 6 октябрь – Ханчжоуда бўлиб ўтаётган ХIХ ёзги Осиё ўйинларининг 13-кунида Ўзбекистон шарафини ҳимоя қилаётган спортчилар мамлакат делегацияси ҳисобига 1 та олтин, 2 та кумуш ва 1 та бронза медалини қўшиб қўйди.

Олтин медаль:

•  Мусобақанинг бадиий гимнастика бўйича беллашувларига киришган Ўзбекистон терма жамоаси аъзолари Таҳмина Икромова, Вилана Савадян ҳамда Эвелина Аталянцдан иборат учлик 324,8 балл жамғарган ҳолда ўйинлардаги барча рақибларини ортда қолдирди. Аҳамиятлиси ушбу натижани ҳеч бир жамоа такрорлай олмади ва Ўзбекистон вакиллари жамоавий дастурда олтин медални қўлга киритди. 

Шунингдек, бугунги чиқишлари орқали Таҳмина Икромова ҳамда Эвелина Аталянцда мазкур спорт турининг яккалик йўналишида кўпкураш дастурида медаллар учун курашиш имкони сақланиб қолди.

Кумуш медаль:

•  Ўйинларининг каноэ слаломида эшкак эшиш бўйича баҳсларда қатнашган Анвар Клевлеев 98.63 сонияли натижа қайд этган ҳолда мусобақа чемпионига айланди. Бироқ кейинчалик унинг олтин медали кумушга айлантирилди. 

Гап шундаки, баҳслардан видеотакрорларни кўриб чиққан ҳакам, унинг рақиби хитойлик спортчига қўлланилган 50 сониялик жаримани олиб ташлаган ва унинг натижасини 98,2 сония қилиб ўзгартирган.

•  Оғир атлетика бўйича Ўзбекистон терма жамоаси аъзоси Акбар Жўраев Осиё ўйинларини кумуш медаль билан якунлади. -109 кг вазн тоифасида иштирок этган Жўраев жами 417 (189+228) кг тош кўтарган ҳолда шоҳсупанинг 2-ўрнини банд этди.

Ушбу йўналишда ғолиблик силтаб кўтариш ва икки кураш бўйича Осиё ўйинлари рекордини ўрнатган хитойлик спортчига насиб этди. Ҳуанҳуа Лиу 418 (185+233) кг натижа кўрсатди.

Бронза медаль:

•  Ўзбекистолик оғир атлетикачи Руслан Нуриддинов силтаб кўтариш баҳсларида 185, даст кўтаришда 233, икки кураш бўйича 391 кг натижа қайд этиб, мусобақанинг бронза медалига эга чиқди.

Маълумот учун, ҳозирда делегация ҳисобида жами 64 медаль (20 та олтин, 18 та кумуш, 26 та бронза) бор. Мамлакат бу орқали медаллар жамғариш бўйича умумий рейтингнинг 5-поғонасидаги ўрнини янаям мустаҳкамлаб қўйди.