O‘zbekistonlik haydovchilar Qozog‘istonga kirishda muammolarga duch kelmoqda 

Bugungi kunda O‘zbekiston fuqarolari Qozog‘iston hududiga Rossiya va O‘zbekiston orqali kirishda taqiq borligi sababli muammolarga duch kelayotganligi holati kuzatilmoqda. Bu haqda Transport vazirligi ma’lum qildi. 

Bildirilishicha, haydovchilarning Qozog‘istonda yo‘l harakati qoidalarini buzganliklari uchun ularga nisbatan ma’muriy chora ko‘rilib, jarima belgilangani taqiq qo‘yilishiga sabab bo‘lgan.

“Ushbu fuqarolar Qozog‘istonning “Kaspi bank ” onlayn tizimidagi “davlat xizmatlari” jarimalar qismida tayinlangan jarimani to‘lagandan so‘ng, mazkur davlat mutasaddi tashkilotlari tomonidan qo‘yilgan taqiqni olib tashlash bo‘yicha choralar ko‘riladi”, deyiladi xabarda.

Eslatib o‘tamiz, avvalroq Qozog‘iston Respublikasining turli hududlarida mehnat faoliyatini amalga oshirib kelayotgan o‘zbekistonliklardan ortga qaytish vaqtida ishonchsiz avtotransport vositalari va haydovchilar xizmatidan foydalanmaslik so‘ralgandi.