Ўзбекистонга ноқонуний тарзда дрон олиб кирганларни жазолаш тартиби ўзгарди

Ўзбекистонда айрим тоифадаги жиноий қилмишлар учун жавобгарлик либераллаштирилди. Кеча, 15 март куни Президент томонидан имзоланган қонун билан айрим кодексларга ўзгартириш ва қўшимчалар киритилди.

Жиноят кодексига киритилган ўзгартиришга кўра:

Учувчисиз учадиган аппаратларни, уларнинг бутловчи ва эҳтиёт қисмларини қонунга хилоф равишда олиб кириш, ўтказиш, олиш, сақлаш ёки улардан фойдаланиш, шундай ҳаракатлар учун маъмурий жазо қўлланилганидан кейин содир этилган бўлса, қуйидагича жазоланади:

• базавий ҳисоблаш миқдорининг 25 бараваридан 50 бараваригача (8 млн 500 минг сўмдан 17 млн сўмгача) миқдорда жарима;
• 3 йилгача ахлоқ тузатиш ишлари;
• 3 йилгача озодликни чеклаш;
• 3 йилгача озодликдан маҳрум қилиш.

Маъмурий жавобгарлик тўғрисидаги кодексга қуйидаги қўшимчалар киритилди:

Учувчисиз учадиган аппаратларни, уларнинг бутловчи ва эҳтиёт қисмларини қонунга хилоф равишда олиб кириш, ўтказиш, олиш, сақлаш ёки улардан фойдаланиш, учувчисиз учадиган аппаратларни, уларнинг бутловчи ва эҳтиёт қисмларини мусодара қилиб, базавий ҳисоблаш миқдорининг 10 бараваридан 20 бараваригача (3 млн 400 минг сўмдан 6 млн 800 минг сўмгача) миқдорда жарима солишга сабаб бўлади.

Мазкур ҳаракатларни содир этган шахс, агар у учувчисиз учадиган аппаратларни, уларнинг бутловчи ва эҳтиёт қисмларини ўз ихтиёри билан топширса, маъмурий жавобгарликдан озод қилинади.

Илгари бу норма мавжуд эмас эди. 

Эндиликда учувчисиз учадиган аппаратларни қонунга хилоф равишда олиб кириш, ўтказиш, олиш, сақлаш ёки улардан фойдаланиш учун аввал маъмурий, кейин жиноий жавобгарлик белгиланди. Аввал тўғридан тўғри жиноий жавобгарлик белгиланган эди.

Қонун расмий эълон қилинган кундан эътиборан 3 ой ўтгач кучга киради.