Ўзбекистонда Малайзия дронлари ишлаб чиқарилади

Ўзбекистон Малайзиянинг Meraque компанияси билан дронларни маҳаллийлаштирган ҳолда ишлаб чиқариш бўйича келишув имзолади. Бу ҳақда Қишлоқ хўжалиги вазирлиги хабар берди.

Вазирликка кўра, айни дамда Ўзбекистон ва Малайзия ўртасида қишлоқ хўжалиги соҳасида бир нечта йўналишда ҳамкорлик йўлга қўйилмоқда. Шу мақсадда Қишлоқ хўжалиги вазирлиги тизими масъуллари, Тошкент ва Қашқадарё вилоятлари ҳамда туман раҳбарлари ва кластерлардан иборат делегация Малайзияда хизмат сафарида бўлиб турибди.

Ташриф давомида ақлли қишлоқ хўжалиги технологиялари ва дронлар ишлаб чиқариш, шоличилик, балиқчилик, каучук етиштириш, мева-сабзавот ва ипак маҳсулотларини экспорт қилиш каби йўналишларда амалий ҳамкорлик ишларини бошлашга келишиб олинган. Хусусан, Meraque компанияси билан ҳамкорликда Тошкент вилоятининг Янгийўл туманидаги Қишлоқ хўжалигини механизациялаштириш илмий-тадқиқот институти ҳудудида ақлли қишлоқ хўжалиги техникалари ва дронларни маҳаллийлаштирган ҳолда ишлаб чиқариш бўйича келишув имзоланган.

Бундан ташқари, Малайзия Қишлоқ хўжалиги тадқиқотларини ривожлантириш институти ва Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар маркази ўртасида имзоланган келишув асосида Малайзиялик селекционер олимлар томонидан яратилган шўрга ва сувсизликка чидамли, қора, узун ҳамда ароматик шоли навларини Ўзбекистонда тажриба сифатида экиб кўпайтириш учун уруғлар олиб келинади. Шу билан бирга, Ўзбекистонда етиштирилган “Девзира” шоли уруғлари Малайзияга жўнатилади.

“Малайзия Қишлоқ хўжалиги ва озиқ-овқат хавфсизлиги вазирлигининг Балиқчилик департаменти ҳамда “Ўзбекбалиқсаноат” уюшмаси ҳамкорлигида Ўзбекистонда Малайзиянинг янги технологиялари асосида интенсив балиқчилик, биофлок ва криветка етиштириш лойиҳалари йўлга қўйилади. Малайзия Қишлоқ хўжалиги маркетинг агентлиги билан ҳамкорликни ривожлантириш орқали Ўзбекистонда етиштирилган мева-сабзавот ва ипак маҳсулотларини экспорт қилиш йўлга қўйилади”, дейилади хабарда.

Бундан ташқари, Малайзиянинг Jakim ташкилоти билан ҳамкорликда Ўзбекистонлик фермерлар ва тадбиркорлар учун Ҳалол сертификати олиш бўйича ўқув курсларини ташкил этиш бўйича келишувга эришилган.

Мазкур ташаббуслар ва инвестиция лойиҳалари юзасидан Малайзияда ўтказилган Ўзбекистон-Малайзия бизнес форуми доирасида Ўзбекистон Қишлоқ хўжалиги вазири ўринбосари Алишер Шукуров тақдимот билан иштирок этган. 

Эслатиб ўтамиз, кеча, 5 февраль куни Ўзбекистон Республикаси Президенти Шавкат Мирзиёев Малайзияга расмий ташриф билан бориб, мамлакат Бош вазири Анвар Иброҳим билан Стратегик шериклик йўлида икки томонлама ҳамкорликни чуқурлаштириш тўғрисида қўшма баёнот имзолаган эди. Шунингдек, қуйидаги ҳужжатлар қабул қилинган:

• Маҳсулотларнинг “ҳалол” стандартларига мувофиқлигини баҳолаш соҳасида ҳамкорлик тўғрисида битим;
• Божхона ишида ҳамкорлик ва ўзаро ёрдам тўғрисида битим;
• Олий таълим соҳасида ҳамкорлик тўғрисида битим;
• Соғлиқни сақлаш соҳасида ҳамкорлик тўғрисида битим;
• Маданият соҳасида ҳамкорлик тўғрисида битим;
• Суд-экспертлик фаолияти соҳасида ҳамкорлик тўғрисида битим;
• Академик-дипломатик ҳамкорлик тўғрисида битим;
• “Ақлли” шаҳарларни ривожлантириш соҳасида ҳамкорлик тўғрисида баённома;
• 2025-2026 йилларда коррупцияга қарши курашиш соҳасидаги шерикликни чуқурлаштириш бўйича қўшма режа.