O‘zbekistonda qish qanday o‘tdi?

2024-2025 yillardagi qish mavsumi davomida iliq to‘lqinlar va sovuq to‘lqinlar bir-biri bilan o‘rin almashishi kuzatildi. Bu haqda O‘zgidromet xabar berdi.

Qayd etilishicha, o‘tgan qishning eng sovuq oyi dekabr bo‘lib, bunda harorat me’yordan 1-2,5 darajaga sovuqroq, respublika shimolida va cho‘l hududlarida me’yor atrofida bo‘ldi.

Ushbu yilda yanvar oyi qish mavsumining eng sovuq oyi degan nomga mos kelmadi, deyarli respublikaning barcha hududlari bo‘yicha yanvar oyi dekabr oyiga nisbatan iliqroq bo‘ldi. Yanvar oyida o‘rtacha oylik havo harorati o‘rtacha ko‘p yillik qiymatlardan 0,5-1 darajaga, shimolda 2-3 darajaga yuqori bo‘ldi.

Fevral oyining harorat tartibi iqlim me’yoriga yaqin bo‘ldi. 
Faqat Farg‘ona vodiysi hududlarida fevral oyining o‘rtacha harorati o‘rtacha ko‘p yillik qiymatlardan 1,5-2 darajaga yuqori bo‘ldi.

Respublika hududining katta qismida eng kuchli sovuqlar dekabr oyida, shimolda esa fevral oyida ham kuzatildi. Sovuq eng kuchli bo‘lgan kunlarda havo harorati 8-13 daraja sovuqqacha, Qoraqalpog‘iston Respublikasida va Navoiy viloyatining shimolida 15-18 daraja sovuqqacha, janubda 3-8 daraja sovuqqacha pasaydi.

Qish mavsumi oylarida kuzatilgan iliq davrlarda kunduz kunlari havo harorati 12-17 daraja iliqqacha, fevral oyi uchinchi o‘n kunligining boshida esa 18-21 daraja iliqqacha, janubda 23-24 daraja iliqqacha ko‘tarildi.

O‘tgan qishning o‘ziga xos xususiyati, bu qish faslining uch oyida ham yog‘ingarchilik taqchilligi kuzatilganligidir. 

O‘zbekiston hududining katta qismida qish davrida yog‘ingarchilik miqdori me’yordan 40-70% ni tashkil etdi, Farg‘ona vodiysi viloyatlarida me’yordan 40% kam bo‘ldi. Faqat yog‘ingarchilik me’yori juda kam bo‘lgan eng qurg‘oqchil hududlarda mavsumiy yog‘ingarchilik miqdori me’yorga yaqin bo‘ldi.

O‘tgan qish mavsumida yog‘ingarchilik asosan yomg‘ir ko‘rinishida qayd etildi, ayrim kunlarda uning qorga aylanishi kuzatildi.

Qish oylarida yog‘ingarchilik taqchilligi O‘zbekistonning tog‘li hududlarida qor to‘planishiga ta’sir qildi.

Qish oxiriga kelib, tog‘lardagi qor qoplami balandligi me’yordan faqat 40-60% ni tashkil etdi.