Ўзбекистонда июлдан Volkswagen Caddy автомобили ишлаб чиқарилиши бошланади

Жамият 13311
image

Жиззах вилоятида июль ойидан бошлаб 7 ўриндиқли Volkswagen Caddy автомобили ишлаб чиқариш бошланади. Бу ҳақда "Ўзавтосаноат" Матбуот хизмати хабар қилди.

Қайд этилишича, бугунги кунда 45 гектар майдонда жойлашган заводнинг қурилиш ишлари якуний босқичида турибди. Завод ва офиснинг асосий қисми бинолари битказилди ва фойдаланиш учун тайёр.

Енгил тижорат автомобиллари ишлаб чиқариш жараёнини жадаллаштириш мақсадида Ўзбекистонга Volkswagen Caddy автомобилларининг бир қисми келтирилиб, улар сертификация бўйича ваколатли органларга иқлим синовлари ва омологация бўйича махсус текширувлардан ўтказиш учун топширилди. Ҳозирда "Ўзстандарт" агентлиги томонидан сертификациялаш ва транспорт воситаларининг амалдаги норматив ҳужжатлар талабларига мувофиқлигини тасдиқлаш, жумладан сертификацияловчи орган томонидан назорат иқлим текширувлари ва Умумий техник регламент талабларига биноан бошқа синовларни ўтказиш ишлари амалга оширилмоқда.

Бир вақтнинг ўзида "Жиззах Авто" МЧЖ томонидан "Volkswagen" дилерлик тармоғини ривожлантириш мақсадида республика ҳудудларидаги қатор дилерлик корхоналар ҳамкорлик қилиш учун танлаб олинди. Volkswagen Caddy русумли автомобиллар савдоси шу йилнинг июль ойидан бошланиши режалаштирилмоқда.

Volkswagen Caddy - 7 ўриндиқли (5-ўриндиқли кўриниши ҳам мавжуд) йўловчи ва юк минивени. Автомобиль ҳам бизнес юритишга, ҳам оилавий фойдаланиш учун тўғри келади. Тежамкор ва технологик (МПИ) двигатель 1,6 литр қувватга эга, бензинда ишлайди. Ёқилғи сарфи – шаҳарда 100 км.га 9,3 литр, трассада 100 км.га 6,1 литр.

Маълумот учун, жорий йилнинг март ойида "Ўзавтосаноат" АЖ ва "Фолксваген Груп Рус" концерни ўртасида "Жиззах Автомобиль Заводи" МЧЖ компанияси базасида енгил тижорат автомобилларини ишлаб чиқаришни ташкил этиш бўйича ҳамкорлик тўғрисида келишув имзоланган.

 
Нуруллоҳ Шарипов
Мақолага баҳо беринг
Баҳолаганлар: 553
Рейтинг: 3
t
×