Ўзбекистонда 2 кун ичида 100 килодан ортиқ наркотик аниқланди

Жорий йилнинг 3-4 февраль кунлари ДХХ ҳамда ИИВ тузилмалари томонидан Ўзбекистон миқёсида 653 та “Қорадори” кенг кўламли тадбирлари ўтказилди ва 228 киши жиноий, 64 киши маъмурий жавобгарликка тортилди. Бу ҳақда Давлат хавфсизлик хизмати хабар берди. 

Маълум қилинишича, мамлакат ҳудудида гиёҳвандлик ва кучли таъсир қилувчи дори воситаларининг ноқонуний муомаласи билан шуғулланиб келаётган шахслар ва жиноий гуруҳлар фаолиятига чек қўйиш мақсадида жами 653 та махсус тадбирлар ўтказилган.

Ушбу тадбирлар давомида жами 112 кг 257 гр гиёҳвандлик воситалари (героин, опий, гашиш, синтетик турдаги гиёҳвандлик воситалари) ҳамда 8601 дона кучли таъсир қилувчи дори воситаларининг аҳоли орасида тарқатилиши тўхтатиб қолинган. Қолаверса, гиёҳвандлик воситаларининг ноқонуний муомаласи давомида тўхтатиб қолинган 287 минг 460 АҚШ доллари ва 569 млн сўм миқдоридаги пуллар далилий ашё сифатида расмийлаштирилган.

Қўзғатилган 222 та жиноят ишлари доирасида 228 нафар шахслар жиноий жавобгарликка тортилган. Шу билан бирга, 64 нафар шахслар маъмурий жавобгарликка тортилган. 47 нафар қидирувдаги шахслар ушланган. 357 нафар шахслар билан профилактик суҳбатлар ўтказилиб, 231 нафари расмий огоҳлантирилган. 

Шунингдек, ўтказилган тадбирлари доирасида 175 та “тиғ”, 58 та “бита”, 24 та “кастет” ва 77 та қурол ҳам топилган.

“Криминоген вазиятни барқарорлаштириш борасидаги тезкор тадбирлар бошқа йўналишларда ҳам давом эттирилади”, дейилади хабарда. 

Эслатиб ўтамиз, Давлат хавфсизлик хизмати ҳамда Ички ишлар вазирлиги тузилмалари томонидан жорий йилнинг 27-31 январь кунлари мамлакат миқёсида “Антитеррор-тозалаш” кенг кўламли тадбирлари ўтказилиб, жиноят ишлари доирасида 169, маъмурий ишлар доирасида 270 киши қамоққа олинганди. Шунингдек, ушбу тадбирлар доирасида оғир ва ўта оғир жиноятлар содир этишга мойил, республикадаги криминоген вазиятга салбий таъсир кўрсатувчи 418 нафар шахслар аниқланиб, уларга нисбатан жиноят ишлари қўзғатилган. Жиноят ишлари доирасида 169 нафар шахслар қамоққа олиниб, 42 та жиноий гуруҳлар фаолиятига чек қўйилган. 399 нафар шахслар маъмурий жавобгарликка тортилиб, уларнинг 270 нафари маъмурий қамоққа олинган. 109 нафар қидирувдаги шахслар ушланган.