Ўзбекистонда ҳаво кескин совийди

Жорий йилнинг 3 октябрь куни Ўзбекистоннинг шимолий ҳудудларига, 4-5 октябрь кунлари республиканинг қолган ҳудудларига совуқ ва нам ҳаво массалари кириб келади. Республика бўйича об-ҳавонинг кескин ўзгариши кутилмоқда. Бу ҳақда Ўзгидромет тезкор огоҳлантириш билан чиқди.

Маълум қилинишича, 3-4 октябрь кунлари шимолда ва чўл ҳудудларда, 4-5 октябрда республиканинг қолган ҳудудларида ёмғир ёғади, баъзи жойларда кучли бўлади, баланд тоғларда қорга айланади.

Ҳаво ҳарорати аста-секин кундуз кунлари 15-20 даражагача, кечалари 5-10 даражагача, шимолда кундуз кунлари 12-17 даражагача, кечалари 2-7 даражагача пасаяди.

3-4 октябрь кунлари республика бўйича баъзи жойларда шамол тезлиги 13-18 м/сониягача кучайиши кутилмоқда, айрим жойларда баъзида чанг-тўзонлар билан 20-22 м/сониягача кучайиши мумкин.

Шунингдек, 5-6 октябрда республиканинг айрим жойларига туман тушиши мумкин.

Эслатиб ўтамиз, Ўзгидромет Ўзбекистоннинг тоғолди ва тоғли ҳудудларида жорий йилнинг 4-5 октябрь кунлари сел-сув тошқин ҳодисалари юзага келиши мумкинлиги ҳақида огоҳлантириш билан чиққан эди.