Ўзбекистон, Тожикистон ва Қирғизистон Президентлари Хўжандда учрашди

Бугун, 31 март куни Тожикистон пойтахти Хўжанд шаҳрида Ўзбекистон Президенти Шавкат Мирзиёев, Тожикистон Президенти Имомали Раҳмон ва Қирғизистон Президенти Садир Жапаров ўртасида учрашув бошланди. Бу ҳақда Тожикистон раҳбарининг матбуот хизмати хабар берди.

Маълум қилинишича, учрашув аввалида Тожикистон раҳбари Имомали Раҳмон қўшни давлатлар раҳбарларини самимий қутлаб, уларни Наврўз байрами билан яна бир бор табриклаган.

“Биз Тожикистонда Қирғизистон ва Ўзбекистон билан яхши қўшничилик, тенг ҳуқуқлилик, ҳурмат ва ўзаро манфаатларни ҳисобга олишга асосланган муносабатларни юксак қадрлаймиз”, деган Тожикистон раҳбари.

Шу билан бирга, Имомали Раҳмон Тожикистон, Қирғизистон ва Ўзбекистон ўртасида уч давлатнинг давлат чегараларининг туташ нуқтаси тўғрисидаги шартнома имзоланганини “жуда муҳим воқеа”, деб баҳолаган.

Қолаверса, давлат раҳбари Иттифоқчилик муносабатлари тўғрисидаги шартнома имзолангани ва бу ҳақда тасдиқловчи мактублар алмашилганидан мамнунлигини билдириб, ушбу тарихий ҳужжатнинг имзоланиши билан “Тожикистон ва Ўзбекистон ўртасидаги муносабатларда ривожланишнинг сифат жиҳатидан янги босқичи бошланганини” алоҳида таъкидлаган.

Имомали Раҳмон ўз нутқи сўнггида уч қўшни давлат раҳбарларининг бугунги учрашуви якунлари “дўстлик, яхши қўшничилик муносабатлари, ўзаро англашув, ҳурмат ва ишончни, шунингдек, мамлакатлар ва қардош халқлар ўртасидаги конструктив ва самарали ҳамкорликни янада мустаҳкамлашга хизмат қилишига” ишонч билдирган.

Эслатиб ўтамиз, Ўзбекистон Республикаси Президенти Шавкат Мирзиёев бугун, 31 март куни Хўжанд шаҳрига келгач, Тожикистон Республикаси Президенти Имомали Раҳмон билан учрашув ўтказганди. Эндиликда Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги шартномани имзолаш режалаштирилган. Президентлар санъат усталари иштирокидаги қўшма концертда ҳам иштирок этади.