Ўзбекистон, Тожикистон ва Қирғизистон чегаралари туташган ҳудудда Дўстлик стеласи очилди

Бугун, 31 март куни Хўжанд шаҳрида ўтаётган олий даражадаги тадбирлар дастурига мувофиқ Ўзбекистон Республикаси Президенти Шавкат Мирзиёев, Тожикистон Республикаси Президенти Имомали Раҳмон ва Қирғиз Республикаси Президенти Садир Жапаров уч мамлакат давлат чегаралари туташган ҳудудда Дўстлик стеласини тантанали равишда очди. Бу ҳақда уч давлат раҳбарларининг матбуот хизматлари хабар берди.

Уч мамлакат Бош вазирлари ўринбосарлари видеоалоқа орқали давлат раҳбарларига қурилиш ишлари якунлангани ва объект тайёрлиги тўғрисида ахборот берди. Маросим чоғида давлат раҳбарлари бир вақтнинг ўзида махсус стендга ўрнатилган тугмани босди. Уч мамлакат Бош вазирлари ўринбосарлари тасмани кесиб, стелани расман очди.

Қайд этилишича, ушбу ёдгорлик қардош мамлакатлар ўртасидаги дўстлик, яхши қўшничилик, ишонч ва стратегик шериклик муносабатлари мустаҳкамланиб бораётганининг янги рамзи бўлади.

Эслатиб ўтамиз, олдинроқ Шавкат Мирзиёев, Имомали Раҳмон ва Садир Жапаров Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги тарихий шартнома имзолаган ҳамда уч давлат раҳбарларининг Қўшма декларацияси қабул қилганди.