Ўзбекистон шахмат федерацияси нуфузли совринлар билан тақдирланди

БАА пойтахти Абу-Даби шаҳрида Осиё шахмат федерацияси томонидан “Asian Chess 2023” саммити ўтказилди. Бу ҳақда Ўзбекистон шахмат федерацияси матбуот хизмати хабар берди.

Саммит доирасида 5th Annual Asian Chess Excellence Awards тақдирлаш маросими бўлиб ўтди. Ўзбекистон шахмат федерацияси уч номинацияда ғолибликни қўлга киритди.

Ҳиндистоннинг Ченнай шаҳрида ўтказилган 44-Бутунжаҳон шахмат Олимпиадасида ғолиб чиққани учун Ўзбекистон йилнинг энг яхши терма жамоаси сифатида эътироф этилди. Озарбайжоннинг Нахчиван шаҳрида ўтказилган Бутунжаҳон ўсмирлар шахмат Олимпиадасида кумуш медални қўлга киритгани учун Йилнинг энг яхши ёшлар терма жамоаси мукофоти ҳам Ўзбекистон шахмат федерациясига топширилди.

Ўзбекистонлик гроссмейстер Нодирбек Абдусатторов йилнинг энг яхши рапид ўйинчиси совринини қўлга киритди.

Эслатиб ўтамиз, январь ойи якунида ўзбекистонлик шахматчиларнинг сўнгги бир йил давомида халқаро ареналардаги эришган натижалари, сенсацион ғалабалари ортидан Ўзбекистон – йилнинг энг яхши шахмат мамлакати деб эътироф этилди. Нидерландияда ўтказилган “Tata Steel Chess-2023” халқаро турнири якунида ўзбекистонлик шахматчилар Нодирбек Абдусатторов ва Жавоҳир Синдоров йилнинг энг яхши шахмат мамлакатига топшириладиган “Tour d'or” — “Олтин минора” совринини қабул қилиб олганди.