Ўзбекистон расмийси Россияни кадрлар тайёрлашнинг устувор йўналиши деб атади

Россия олий ўқув юртлари билан биргаликда муҳандис-техник кадрлар тайёрлаш Ўзбекистон учун устувор йўналиш ҳисобланади. Бу ҳақда Ўзбекистон Олий таълим, фан ва инновациялар вазирининг биринчи ўринбосари Комилжон Каримов Санкт-Петербургда бўлиб ўтган Россия Федерацияси ва Ўзбекистон Республикаси университетлари ректорларининг III ҳудудлараро конференциясида маълум қилди, деб ёзмоқда ТАСС. 

“Ўзбекистон учун – бу ҳақда бугунги конференциянинг очилишида ҳам гапирган эдик – Россия олий ўқув юртлари билан ҳамкорликда муҳандис-техник кадрлар тайёрлаш мутлақ устувор вазифадир. Муҳандислар деганда биз жуда кенг мутахассисликларни, хоҳ машинасозлик, хоҳ транспорт, хоҳ энергетика, хоҳ қурилиш бўлсин – улкан қатламни назарда тутамиз. Россия Федерацияси университетларида мавжуд бўлган катта илмий ва таълим салоҳиятини ҳисобга олган ҳолда, бу биз учун устувор йўналишдир”, дейди Комилжон Каримов. 

Қайд этилишича, конференция доирасида Санкт-Петербург давлат университети ва Ўзбекистон Республикаси Мактаб ва мактабгача таълим вазирлиги ўртасида математика, физика, кимё, биология ва рус тили фани ўқитувчиларининг тажриба алмашиши ва уларнинг малакасини ошириш бўйича ўзаро англашув меморандуми имзоланган. Қўшма таълим дастурлари ва бошқа лойиҳаларни амалга ошириш Санкт-Петербург давлат университетининг Тошкентдаги филиали негизида амалга оширилади.

“Санкт-Петербург университетига Ўзбекистондан келган йигитлар собиқ иттифоқнинг бошқа республикаларидан кўра яхшироқ ўқийдилар. Магистратурага келган йигитлар, Ўзбекистон олий ўқув юртлари битирувчилари бизни ва дастурларимизни яхшироқ тушунишади”, дейди Санкт-Петербург давлат университети ректори Николай Кропачев. 

Санкт-Петербург давлат университети Ўзбекистоннинг 11 та олий ўқув юрти ва ташкилотлари, жумладан, Бухоро давлат тиббиёт институти, Тошкент давлат шарқшунослик институти, Самарқанд давлат университети ва бошқалар билан ҳамкорлик қилиш бўйича асосли шартномаларга эга. Кропачевнинг айтишича, тиббиёт, математика ва дастурлаш фанлари Санкт-Петербург давлат университетининг ўзбекистонлик талабалари орасида жуда машҳур.