Ўзбекистон Францияга Россия орқали уран етказиб беради

Ўзбекистон бир йил давомида Францияга уран етказиб бериш учун Қозоғистон компанияси билан шартнома имзолади. Тегишли шартнома Ўзбекистон Республикаси товар-хомашё биржаси сайтига жойлаштирилди.

Қайд этилишича, Қозоғистон компанияси 500 контейнер уран концентратини Санкт-Петербург орқали Францияга етказиб беради. Ўзбекистоннинг “Навоийуран” давлат корхонаси бу учун Қозоғистоннинг TOO Logistic Centre компаниясига 9 миллион евро тўлайди. Уран Франция жанубидаги Малвези коммунасига етказиб берилади.

Тариф бўш контейнерларни Франциянинг Марсель шаҳрига қайтариш нархини ўз ичига олади. Ташиш Санкт-Петербург портидан юк жўнатилган кундан бошлаб 15 кун мобайнида амалга оширилиши лозим.

Шартнома учун дастлабки нарх 11 миллион еврони ташкил этган. Кейинчалик мазкур сумма камайтирилган. Уран 2026 йилнинг биринчи чораги охиригача ташилади. “Навоийуран” ҳозирда “Converdin Enterprise” (АҚШ) ва “Cameco Corporation” (Канада) қайта ишлаш корхоналарига уран ташиш бўйича пудратчи қидирмоқда.

Эслатиб ўтамиз, жорий йилнинг 11-13 март кунлари Ўзбекистон Президенти Шавкат Мирзиёевнинг Францияга давлат ташрифи давомида Orano ва “Навоийуран” ўзларининг Nurlikum Mining қўшма корхонасининг Жанубий Женгелди уран қазиб олиш лойиҳасини ривожлантириш учун асос яратадиган келишувни эълон қилганди.