Ўзбекистон февралда 12 тонна олтин сотиб, дунёда етакчи бўлди

Ўзбекистон Марказий банки февраль ойида 12 тонна олтин сотди ва дунёда етакчи бўлди. Бу ҳақда Жаҳон олтин кенгаши хабар берди.

“Февраль ойидаги соф сотувчилар – Қозоғистон Миллий банки (-8 тонна) ва Ўзбекистон Марказий банки (-12 тонна) бўлди. Ҳар иккала марказий банк йил бошидан буён энг катта соф сотувчи сифатида етакчилик қилмоқда”, дейилади кенгаш шарҳида.

Қайд этилишича, марказий банклар томонидан олтинга бўлган талаб давом этмоқда. Февраль ойи маълумотларига кўра, глобал марказий банклар олтин захиралари 24 тоннага ошган. Ҳозиргача Польша, Хитой, Туркия ва Чехия ривожланаётган бозорлар марказий банклари орасида олтин харидида етакчилик қилмоқда.

Маълумот учун, 1 апрель ҳолатида Ўзбекистоннинг олтин-валюта захиралари 47,8 миллиард долларни ташкил қилган.

Эслатиб ўтамиз, январь ойида Ўзбекистон 8 тонна соф олтин харид қилиб, дунёда энг юқори кўрсаткич қайд этганди. Натижада мамлакатнинг олтин захиралари 391 тоннага етиб, жами захираларнинг 82 фоизини ташкил қилган.