Ўзбекистон энг кўп олтин сотиб олган етакчи давлатлар қаторига кирди

Ўзбекистон Марказий банки ўтган йилнинг декабрь ойида Халқаро валюта жамғармасидан олтинни энг кўп сотиб олган харидорлардан бири бўлди. Ушбу маълумотлар жамғарма томонидан маълум қилинган. 

Қайд этилишича, ўтган йилнинг декабрь ойида жаҳон расмий олтин захиралари 14,2 тоннага ошган. Бунда Туркия ва Ўзбекистон ой давомида ялпи харидларни кўтарган. 

Қайд этилишича, Туркия декабрь ойида 10,1 тонна олтин сотиб олиб, олтин захирасини 394,2 тоннага етказган. Ўзбекистон эса ноябрь ойида 21,5 тонна сотганидан кейин декабрь ойи ичида олтин захирасига 8,4 тонна қўшган.

Шунингдек, Ҳиндистон ҳам фаол олтин сотиб олган давлатлар рўйхатига кирган. У  3,7 тонна олтин сотиб олган ва  олтин захирасини 754,1 тоннага етказган. Кейинги ўринларда эса, Қирғизистон (1,1 тонна), Чехия (0,4 тонна) ва Украина (0,3 тонна) ҳам ой давомида сезиларли харидорлар бўлган. 

Қозоғистон Миллий банки олтинни декабрь ойида энг фаол сотган (4,8 тонна) давлат бўлган. Иккинчи ўринда Шри-Ланка бўлиб, у бир ой ичида 3,6 тонна ёки олтин захираларининг ярмини сотган. Учинчи ўринни 1,6 тонна билан Польша эгаллаган.

Аввалроқ, Ўзбекистон олтин-валюта захираси 1 январь ҳолатига 35 млрд 139 млн долларни ташкил этиб, ўтган бир ойда мамлакатнинг халқаро захиралари 389,8 миллион долларга ўсгани ҳақида хабар бергандик.