Ўзбекистон 25 турдаги озиқ-овқат маҳсулоти импортига қарам бўлиб қолаётгани айтилди

Ўзбекистон 25 турдаги озиқ-овқат маҳсулотлари импортига боғлиқ бўлиб қоляпти. Бу ҳақда бугун, 5 сентябрь куни Президент Шавкат Мирзиёев раислигида ўтказилаётган йиғилишда сўз борди.

Қайд этилишича, Андижон, Бухоро, Хоразм вилоятлари ерлардан самарали фойдаланиб, 3 мартагача ҳосил олиб, ички бозорни таъминлаш билан бирга экспортни 1,5 бараварга оширган. 

Ислоҳотлар натижасида республикада парранда гўшти, тухум, балиқ, гуруч маҳсулотлари билан таъминлаш даражаси анча яхшиланган. Мисол учун, сўнгги 3 йилда:

•    балиқ етиштиришни Андижон 4 минг тоннадан 25 минг тоннага, Бухоро  3,5 минг тоннадан 23 минг тоннага оширган;

•    парранда гўштини Самарқанд 22 минг тоннадан 100 минг тоннага, Тошкент вилояти 31 минг тоннадан 90 минг тоннага етказган; 

•    тухум ишлаб чиқаришни Сирдарё 127 миллион донадан 200 миллион донага, Наманган 480 миллион донадан 700 миллион донага, Фарғона 350 миллион донадан 600 миллион донага кўпайтириб, тўлиқ ўзини-ўзи таъминлаяпти.

Лекин, айрим вилоят ҳокимлари бу ишларни тўғри ташкил қила олмагани қайд этилди.

“Нима, бу вилоят ҳокимлари ҳудудига қанча озиқ-овқат етишмаслиги, қанча импорт кираётганини билмайди-ми?”, дея савол қўйди Президент. 

Ички бозор 25 турдаги озиқ-овқат маҳсулотлари импортига боғлиқ бўлиб қолаётгани қайд этилди.

Президент бу ҳолатни қаттиқ танқид қилиб, мутасаддиларга вилоят, туман ва шаҳар ҳокимлари билан бирга бир ой муддатда ушбу 25 турдаги импорт маҳсулотларини мамлакатда ишлаб чиқариб, кўпайтириш бўйича лойиҳа пакетларини тақдимот қилиб, ҳукумат қарорини чиқариш топширилди.

Келгуси йил олти ой якуни билан бу борада ўзгариш қилмаган вилоят ҳокимлари ишдан олиниши кўрсатиб ўтилди.