Ўзбекистонлик дзюдочилар IJF рейтингида юқорилашди

БАА пойтахти Абу-Дабида бўлиб ўтган дзюдо бўйича "Катта дубулға" баҳслари якунига етганидан сўнг, Халқаро дзюдо федерацияси (IJF) дзюдочиларнинг янгиланган рейтингини эълон қилди.

"Катта дубулға" мусобақасида мувафаққиятли иштирок этган Ўзбекистон вакиллари рейтингда сезиларли даражада юқорилашди. Жумладан, Ўзбекистон вакиласи Диёра Келдиёрова аёллар ўртасида -52 кг вазн тоифасида 4-поғонадан жой олган бўлса, эркаклар ўртасида -73 кгда Шаҳрам Аҳадов 24-ўринни эгаллади.

Тошкентда ўтказилган дзюдо бўйича Жаҳон чемпионатида ғолибликни қўлга киритган Давлат Бобонов ҳамон -90 кгдаги спортчилар орасида етакчилик қилмоқда. Охирги мундиалда ғолиб бўлган яна бир Ўзбекистон вакили Музаффар Тўрабоев -100 кгда кучли ўнликни якунлаб берди.

Эслатиб ўтамиз, ўзбекистонлик дзюдочилар Тошкентдаги Жаҳон чемпионатида 2 та олтин, Абу-Дабидаги "Катта дубулға" мусобақасида 1 та кумуш ва бронза медалига эга чиқишганди.

Шахзод Шукуров