Ўзбек жангчиларини четга олиб чиқаётганлар, спортчиларга эътиборли бўлинг – Рўзибоев (видео)

Ижтимоий тармоқларда Қозоғистоннинг “Octagon” лигаси жангчилари ўзбекистонлик Одилхон Камолов қозоғистонлик Эркебулан Токтар иштирокида видеолар тарқалмоқда. Видеода иккала поп ММА устаси худдики, навбатдаги треш-токни уюштираётгани, бироқ Токтар Камоловнинг юзига зарба йўллагани акс этган.

Мазкур видео тарқалгач, Камолов ўз Instagram саҳифасига видео жойлаб, Қозоғистонда хавфсизлиги таъминланмагани, Токтардан бошқа шахслар ҳам треш-токка аралашганини билдирди. Бўлиб ўтган ҳолатларга эса ўзбекистонлик UFC жангчиси Нурсултон Рўзибоев норозилик билан чиқди.

“Ўзбекистонда ММА турнирлари ўтказилса, бошқа давлатлардан жангчилар меҳмон бўлиб келади ва бизни мамлакатдан ҳеч ким норози бўлиб кетмаган. Спортчиларнинг ҳурмати доим жойига қўйилган. Ўзбек жангчилари чет давлатга чиққанда эса айрим муаммоларга дуч келаётганининг гувоҳи бўляпмиз. Ўзбекистонлик жангчиларни чет элга олиб чиқаётганлар спортчиларимизга сал эътиборли бўлинг. Ҳамма нарсани жангчиларнинг ўзи ҳал қилса, катта муаммолар юзага келиши мумкин. Бундай ҳолатлар ўзимнинг ҳам бошимдан ўтган”, дейди Рўзибоев.

Бир кун аввал кўплаб ўзбекистонлик MMA жангчилари “Octagon” лигасининг матбуот анжуманида қатнашиши учун Олмаота шаҳрига йўл олди. Бўлиб ўтган вазиятга эса Токтар ҳам ўз муносабатини билдирди.

“Шахсий душманлик фақат Одилхонга тегишли, мен ўзбек халқини ҳурмат қиламан ва севаман, лекин бу одам энди ўз ёлғонлари билан халқларни қарама-қарши қўймоқчи. Бу шахсий можаро ва халқларга тааллуқли эмас. Бу одамга ишонманг!”, дейди Токтар.