Умурзоқов иссиқхоналарни муқобил энергияга ўтказиш учун маблағ ажратишга кўрсатма берди

Ўзбекистонда иссиқхоналарни муқобил энергия – кўмирга ўтказиш режалаштириляпти. Бу масала Ўзбекистон Президенти Администрацияси раҳбари Сардор Умурзоқов бошчилигидаги йиғилишда муҳокама қилинди.

Сўзга чиққан тадбиркорларнинг барчаси иссиқхоналарни кўмир орқали иситишга ўтиш маълум вақт талаб этиши, буни аввал ҳар томонлама ўрганиб чиқиш, синчковлик билан синовдан ўтказиш, тижорий томонларини ҳисоб-китоб қилиш зарурлигини таъкидлаган. Мазкур масала юзасидан ишчи гуруҳ тузилиб, тегишли мутахассислар ва тадбиркорлар билан биргаликда ҳолатни батафсил ўрганиб чиқиш юзасидан топшириқ берилган.

Бунда ишчи гуруҳ ҳар бир иссиқхона кесимида уларнинг молиявий аҳволини ўрганиб чиқиб, тадбиркорларни қўллаб-қувватлаш юзасидан аниқ асосланган таклифлар тайёрлайди. Ўз навбатида иссиқхона юритувчи тадбиркорларга ўз ҳосилларини нес-нобуд қилмасдан етиштириб олиши учун зарур шароитлар яратиш мақсадида 1 кун ичида тегишли манбалардан молиявий маблағ билан таъминлаш бўйича кўрсатмалар берилган.

Аввалроқ Умурзоқов бошчилигидаги йиғилишда бир кун ичида иссиқхоналарни газ билан таъминлашни тиклаш бўйича топшириқ берилгани хабар қилинганди.