Улуғбек Қосимовга янги ўринбосар тайинланди

Амиров Алишер Хуррамович Сурхондарё вилояти ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари лавозимига тайинланди. Бу ҳақда вилоят ҳокимлиги ахборот хизмати хабар берди. 

Алишер Амиров 1977 йил Бойсун туманида туғилган. Маълумоти олий – 2001 йилда Тошкент автомобиль-йўллари институтини, 2014 йилда Ўзбекистон Республикаси Президенти ҳузуридаги Давлат бошқаруви академиясини тамомлаган. Маълумоти бўйича мутахассислиги – ер усти транспорти тизимлари муҳандиси.

У меҳнат фаолияти давомида Ўзбекистон автомобиль ва дарё транспорти агентлиги Тошкент вилояти бўлими шўъба мудири, “Ўзавтойўл” давлат-акциядорлик компаниясида бошқарма бошлиғи, бошқарув раисининг ўринбосари, Сурхондарё вилояти ҳокимининг ўринбосари, Шеробод тумани ҳокими лавозимларида фаолият юритган.

Мазкур лавозимга тайинлангунга қадар 2021 йилдан буён Ўзбекистон Республикаси Транспорт вазирлиги ҳузуридаги автомобиль йўллари қўмитаси минтақавий йўлларга буюртмачи бошқармаси бошлиғи лавозимида ишлаётган эди.