Украиналик ҳарбийлар хорижда тайёрланмоқда. Улар қаерда нимани ўрганмоқда?

АҚШда 7 мингга яқин украиналик ҳарбий хизматчилар, унинг иттифоқчиси бўлган 26 давлатда яна 11 минг нафар ҳарбийлар тайёргарликдан ўтди. Бу ҳақда Пентагон матбуот котиби Патрик Райдер маълум қилди.

“Ҳозирги вақтда Германиянинг Хоэнфельс ва Графенвёр полигонларида Украина Қуролли Кучларининг 1200 нафар ҳарбий хизматчисидан иборат иккита моторлаштирилган пиёда батальонлари иштирокида қўшимча қўшма қуролли машқлар ўтказилмоқда”, дея қўшимча қилган Райдер.

Пентагон вакилининг сўзларига кўра, 2022 йил апрелидан буён украиналик аскарлар турли дастурлар бўйича тайёргарликдан ўтган. Шу ҳафтада ҳаво ҳужумидан мудофаа бўлинмаларининг 65 нафар украиналик ҳарбийси Оклахомада Patriot зенит-ракета тизимларини бошқариш бўйича машғулотларни якунлаган ва аллақачон Европага қайтган.

“Қўшма Штатлар Украина халқига хавфсизлик соҳасида ёрдам кўрсатиш учун иттифоқчиларимиз ва ҳамкорларимиз билан машғулотларни давом эттиради ва яқиндан ишлайди”, дейди Райдер.

Бундан ташқари, Украина Қуролли кучлари Бош штаби жорий йилнинг 29 март куни швед ҳарбий инструкторлари украиналик ҳарбийларга пистирма қўйиш ва ўрмонларда жанговар ҳаракатлар олиб боришни ўргатаётгани ҳақида хабар қилган. Тренинг Буюк Британияда Украина аскарлари учун кенг кўламли ўқув дастурининг бир қисми сифатида ўтказилган. Британия ҳукуматининг хабар беришича, ҳар 120 кунда 10 минггача украиналик аскарни тайёрлаш режалаштирилган.

Жорий йилнинг 27 март куни эса Украина танк экипажлари Британиянинг Challenger 2 танкларини бошқариш бўйича ўқув машғулотларини якунлаган. Машғулотлар экипаж таркибида қўмондонлик, бошқарув ва жамоавий иш бўйича кўрсатмаларни ўз ичига олган. Дастлабки маълумотларга кўра, тайёргарликдан ўтган ҳарбийлар баҳорги қарши ҳужумда иштирок этади.