Украинага ракета ҳужуми ортидан ЕИ Россияга янги санкциялар жорий этиши мумкин

Европа Иттифоқига аъзо давлатлар Россияга қарши янги, тўққизинчи санкциялар пакетини жорий этиш масаласини муҳокама қилмоқда. Бу ҳақда ТАСС нашри маълум қилди.

“Ҳа, 10 октябрда кузатилган навбатдаги кескинлашувдан кейин Россияга қарши санкцияларнинг янги босқичи муҳокама қилинмоқда”, дейилади хабарда.

Нашрга маълумот берган дипломат Россия газига юқори нарх чегарасини жорий этишга оид саволга бу ҳали муҳокама қилинмаганини айтган.

Манбага кўра, тўққизинчи санкциялар тўплами ҳам иқтисодий, ҳам индивидуал чекловчи чораларни ўз ичига олиши мумкин.

Қайд этилишича, Европа Иттифоқи мамлакатлари Россия Федерацияси юридик ва жисмоний шахсларининг музлатилган активларини мусодара қилиш имкониятини муҳокама қилмоқда.

Бошқа бир европалик дипломатга кўра, шахсий санкцияларда "катта балиқлар қолмаган".

“Қора рўйхат”га киритилиши мумкин бўлган “йирик балиқлар” йўқ. Айтиш мумкинки, улар бир нечта санкциялар пакетидан олдин тугаган”, дейди у.

Эслатиб ўтамиз, 6  октябрь куни Европа Иттифоқи Россия Федерацияси таркибига тўрт субъектнинг қўшилиши муносабати билан Россияга қарши саккизинчи санкциялар пакетини киритди.