Украинадаги урушда қатнашган ўзбекистонлик Россияда қамалиши мумкин

Россиянинг Пермь шаҳрида қуролли безориликда айбланган Ўзбекистон фуқароси Ойбек Солиевнинг жиноий иши бўйича суд мажлислари бошланди. Бу ҳақда РБК хабар берди.

Тергов маълумотларига кўра, у Украинадаги Шимолий ҳарбий округ зонасига учинчи марта кетмоқчи бўлган ва “Защитники Отечества” давлат жамғармасининг маҳаллий бўлимига F-1 пиёдаларга қарши мудофаа гранатасига ўхшаш ўйинчоқ граната билан келган.

Солиев “ушбу ўйинчоқни нотўғри олиб юриш”да айбни тан олмоқда, лекин фонд ходимларига таҳдид қилганлик айбини рад этган. 35 ёшли Ойбек Солиевнинг айтишича, у Украинада икки марта урушда қатнашган. Унинг ўпкасининг ўнг қисми ва иккала оёғи шикастланган. Тан олинмаган Луганск халқ республикаси тақдим қилган ҳарбий билетда унинг халқ милициясида хизмат қилганлиги тўғрисидаги ёзув мавжуд. Шифохонадан олинган маълумотномада катта лейтенант унвони кўрсатилган. 

Жиноят ишига судланувчининг Ўзбекистон паспорти нусхаси ҳам қўйилган. Ҳужжатнинг ўзи сақланиб қолмаган. Солиевнинг айтишича, жанг пайтида унинг паспорти ёниб кетган.

Ростов-Дондаги шифохонадан Пермга реабилитация қилиниш учун борган Солиев Россия Мудофаа вазирлиги билан шартнома тузиб, Шимолий ҳарбий округга қайтишга ҳаракат қилган. Ҳарбий прокуратура ва комендатурадан жавоб кутар экан, пайвандчи бўлиб ишлаган. Аввалига ётоқхонада ва ташландиқ уйларда, кейин ижарага олган бошқа бир уйда кун кечирган.

2024 йил 6 июндан бери собиқ жангчи панжара ортида. У оғир жиноятда айбланмоқда. Тергов маълумотларига кўра, 6 июнь куни маст ҳолатда бўлган Солиев “Защитники Отечества” Шимолий ҳарбий округи иштирокчилари давлат жамғармасининг Пермь бўлимига борган. Вилоят ҳарбий хизматчиси Владимир Нохрин билан суҳбат чоғида у спорт курткасининг чўнтагидан яшил рангга бўялган ва ташқи томондан лимондан фарқ қилмайдиган пиёдаларга қарши F-1 мудофаа гранатасининг ўйинчоқ вариантини чиқарган. Нохрин ўзи ва ходимлар ҳаётидан хавотирланиб, Солиевни алоҳида кабинетга – психологга боришга кўндирган. У ерда Солиев яна гранатани чўнтагидан олган. Учинчи марта у гранатани кўчада, фонд бошлиғи Константин Строгий олдида кўрсатган.

Ушбу Ўзбекистон фуқароси безорилик, яъни жамоат тартибини қўпол равишда бузиш, жамиятга нисбатан очиқ ҳурматсизликни ифодалаш, қурол сифатида фойдаланилган ашёни қўллаш орқали жиноят содир этилганликда айбланиб, судланувчи 7 йилгача озодликдан маҳрум этилиши мумкин.

Эслатиб ўтамиз, аввалроқ Россиянинг Украинага қарши ҳарбий ҳаракатларида қатнашган ўзбекистонликка суд ҳукми ўқилганди. Суд ҳужжатида келтирилишича, 2001 йилда Қорақалпоғистон Республикасининг Амударё туманида туғилган йигит 2023 йилнинг декабрь ойида Россиянинг Москва шаҳрига ишлаш мақсадида кетган. Шу йилнинг 5 февраль куни моддий манфаатдорлик эвазига Россия тарафини олиб Украинага қарши ҳарбий ҳаракатларда қатнашиши юзасидан Россия Мудофаа вазирлиги Москва бўлими билан шартнома қилган. Унга “оддий аскар” махсус ҳарбий унвони берилган ва “ўқчи” лавозимига тайинланиб, махсус ҳарбий жанговар тайёргарликдан ўтган.

9 февраль куни эса йигит ҳарбий лагердан қочиб, Россиядан Ўзбекистонга “Москва-Урганч” авиарейси орқали учиб, ўзининг Амударё туманидаги доимий яшаш манзилига қайтиб келган.