Украинадаги урушда ҳалок бўлган ва яраланганлар сони 1 миллиондан ошди

Украинадаги урушда 1 миллиондан ортиқ одам ҳалок бўлган ёки яраланган. Бу ҳақда кеча, 12 декабрь куни НАТО Бош котиби Марк Рютте Брюсселдаги матбуот анжуманида маълум қилди.

Унинг таъкидлашича, ҳар ҳафта икки томондан 10 мингдан ортиқ одам ҳалок бўлмоқда ёки яраланмоқда. Шунингдек, Рютте Украинадаги воқеаларни Иккинчи жаҳон урушидан кейинги Европадаги энг қонли можаро деб атаган. Рютте нутқи давомида бошқа НАТО аъзоларини ҳам яқин орада Россия билан урушга тайёргарлик кўришга чақирган.

“Тўрт ёки беш йилдан кейин бизни нима кутаётганига тайёр эмасмиз ва билмаймиз. Украинада содир бўлаётган воқеалар биз билан ҳам содир бўлиши мумкин”, деган Рютте.

НАТО Бош котиби альянс аъзоларини "уруш давридаги фикрлашга" ва ҳарбий харажатларни “турбо” режимига етказишга чақирган.

“Агар биз ҳозир урушнинг олдини олиш учун кўпроқ маблағ сарфламасак, кейинроқ жанг қилиш учун бунданда кўпроқ пул тўлаймиз. Миллиардлар эмас, триллионлаб евролар”, деган у.

Эслатиб ўтамиз, аввалроқ Марк Рютте Россияни музокаралар столига қўймасдан, Украина бўйича тинчлик келишувларини муҳокама қилиш катта хавф туғдиришини айтганди.