Украина Жаҳон чемпионатига мезбонлик қила оладими? Спорт вазири жавоб берди

Украина ёшлар ва спорт вазири Вадим Гутцайт 2030 йилги футбол бўйича Жаҳон чемпионати Украинада ўтказилиши мумкинлиги ҳақида фикр билдирди. Бу ҳақда Гутцайт “ProUA” YouTube каналига берган интервьюсида айтиб ўтди.

“Имкониятлар катта, чунки Украина ҳозир дунёда трендга айланганини кўряпсиз. Шу боис, яқин келажакда тайёргарлик кўриш, стадионлар қуриш, инфратузилмани яратиш имконига эга бўлсак, Украинада Жаҳон чемпионатини ўтказиш учун катта имкониятларга эга бўламиз. Бизда катта тажриба бор. Украина 2012 йилда Европа чемпионатини юқори савияда ўтказди. 2018 йилда Европа Чемпионлар лигаси финалига мезбонлик қилди. Биз нима қилишни яхши биламиз”, дейди Гутцайт.

2022 йил октябрь ойида Украина, Испания ва Португалия 2030 йилги футбол бўйича Жаҳон чемпионатига мезбонлик қилиш учун даъвогарлар рўйхатига қўшилганди.

Маълумот учун, 2026 йилги Жаҳон чемпионати учта давлат – АҚШ, Канада ва Мексикада ўтказилади. Сўнгги мундиалга ўтган йили Қатар мезбонлик қилди. ЖЧ-2022 да Аргентина терма жамоаси ғолибликни қўлга киритганди.