Украина ютқазмаяпти – Зеленский катта интервью берди

Украина Президенти Владимир Зеленский ҳақидаги “Шоумен” китобининг муаллифи, америкалик журналист Саймон Шустер Зеленский билан янги катта интервью асосида материал эълон қилди. Қуйида интервьюдан асосий парчалар жамланган.

Фронтдаги вазият ҳақида

Аҳолиси Украинага нисбатан уч баравар ва ялпи ички маҳсулот ҳажми ўн баравар кўп бўлган Россия тўқнашувни узоқ муддатга, аҳволни сўндиришга қодир. Шу билан бирга, Зеленский айтишича, у ёмон келишув тузишдан кўра, умуман келишув тузмасликни афзал кўради. Шунингдек, у “қадрли ва барқарор” тинчликка эришиш учун керак бўлса курашни давом эттиришга тайёр эканини билдирган. 

“Украина ютқазмаяпти”, дейди у Шустер Украина Қуролли кучлари фронтдаги вазиятни баҳолашини сўраганида.

Трамп учун урушни тугатишнинг аҳамияти

Зеленскийнинг айтишича, Европа учун ўнлаб йиллар ичида энг қонли бўлган Украинадаги урушни якунлаш АҚШ Президенти Дональд Трампнинг тинчликпарвар сифатидаги обрўсини мустаҳкамлаши ва унга 2026 йил ноябрида бўладиган Конгресснинг ўрта муддатли сайловларида сиёсий фойда келтиради.

“Ҳа, у ўлимларни камайтиришни хоҳлайди. Аммо катталар тилида айтганда, бу шунчаки унинг ғалабаси, сиёсий ғалабаси”, дейди Зеленский.

Хавфсизлик кафолатлари ҳақида

Ҳозирда бу Зеленский учун энг муҳим масала. Трампни воситачи сифатида йўқотиш хавфи бўлса-да, у асосий шартини такрорлайди: АҚШ ва Европа келажакда Россиянинг ҳужумларидан Украинани ҳимоя қилишга кафолат бериши керак, акс ҳолда ҳар қандай тинчлик келишуви фойдасиз. Аммо америкаликлар ҳали на Украинага хавфсизлик кафолатлари бўйича шартнома имзолаган, на унинг асосий параметрлари бўйича келишиб олган. Ҳозирча Трамп вакилларининг жавоблари Зеленский томонидан қабул қилиниши учун жуда “ноаниқ ва чекинувчи” кўринади.

“Буларнинг барчаси ёзма шаклда баён қилиниши керак”, дейди у.

Ермакни Буданов билан алмаштириш

Зеленский Андрей Ермакни Президент офиси бошлиғи лавозимидан бўшатиш ҳақида гапирганда буни коррупция муаммоаси сабабли қилганини тан олмаган. У бунинг “ўз сабаблари” бўлганини айтган.

Украина Президентининг янги офис бошлиғи Кирилл Буданов ўзидан олдинги лавозимдагидан кўра компромисларга кўпроқ моил, ҳатто ҳудудий масалаларда ҳам. У Президент ёрдамчилари билан учрашувлар ўтказиб, Қуролли кучлар Донбасснинг Киев назоратидаги ҳудудлардан чекиниши, лекин Россия армияси уларни эгаллай олмаслигини қандай таъминлаш бўйича муҳокама қилган.

“Улар ҳақиқатан ҳам ижодкорлик кўрсатмоқда, буни қандай қилиб одамлар қабул қилиши мумкинлигини излаяпти”, дейди Зеленский Шустерга.

Бой берилган имконият 

Украина 2022 йил охирида Херсонни қайтариб олгач, АҚШ Киевни Москвага музокара бошлашга чақирган. “Фурсатдан фойдаланинг”, деган Оқ уй бош ҳарбий маслаҳатчиси Марк Милли. Аммо Киев ва Москва ўртасидаги тинчлик музокаралари фақат 2025 йилда, Украина Қуролли кучларининг майдондаги ютуқлари ортда қолган ва Россия армияси секин, аммо барқарор олдинга силжиш қилаётган пайтда қайта бошланган.

“Биз ҳеч қачон урушни тўхтатишга қарши бўлмаганмиз. Бу руслар эди, улар мулоқотга тайёр эмаслигини кўрсатди”, дейди Украина етакчиси.