Украина яна Россия танкерларини бомбардимон қилди (видео)

Бугун, 11 июлга ўтар кечаси Украина Азов денгизида Россиянинг “соя флоти”га тегишли 28 та кемага зарба берди. Бу ҳақда Украина Қуролли кучларининг Учувчисиз тизимлар кучлари қўмондони Роберт Мадяр Бровди маълум қилди.

Унинг сўзларига кўра, зарбага учраган кемалар орасида 21 та танкер, 4 та буксир, 2 та қуруқ юк кемаси ва 1 та махсус кема бор. Уларга жами 73 та аниқ зарба берилган.

Бровдининг айтишича, жорий йилнинг 6–11 июль кунлари давомида Россиянинг Азов денгизидаги жами 76 та нишони урилган. Ушбу ҳужумлардан сўнг Россиянинг “соя нефть флоти” сезиларли йўқотишларга учраган ва Керч бўғози орқали кемалар ҳаракати деярли тўхтаган.

Бундан ташқари, Украина ҳарбийлари шу кеча вақтинча босиб олинган Қрим ҳамда Украинанинг жанубидаги оккупация қилинган ҳудудларда жойлашган 53 та ҳарбий объектга ҳам зарба берган.

Шунингдек, Азов денгизида турган Россиянинг “Санар-17” танкери ҳам бутунлай йўқ қилингани билдирилган.

Эслатиб ўтамиз, жорий йилнинг 9 июлга ўтар кечаси Украина Қуролли кучлари Бош штаби Азов денгизида Россияга тегишли 12 та танкер, битта буксир ва битта қуруқ юк кемасига зарба берган эди.