Украина Трампнинг Truth Social тармоғини блоклаб қўйди

АҚШ Президенти Дональд Трампнинг Truth Social ижтимоий тармоғи Украина Президенти Владимир Зеленский ҳақидаги постларидан сўнг ушбу мамлакатда ишлашни тўхтатди. Бу ҳақда “Sputnik International” хабар берди. 

Ҳозирда маҳаллий IP-манзиллар орқали Truth Social’га кириш имконсиз бўлиб қолган. Блокировка бугун, 20 февраль куни кундузи амалга оширилган. Украина расмий идоралари АҚШ Президентининг ижтимоий тармоғини блоклаш бўйича қарор қабул қилингани ҳақида маълумот бермаган. Украина Давлат махсус алоқа ва ахборотни муҳофаза қилиш хизмати ҳамда интернет ресурсларини тартибга солувчи бошқа идораларнинг сайтларида ҳам Truth Social’га қарши чоралар кўрилгани ҳақида ҳеч қандай эълон берилмаган.

Эслатиб ўтамиз, кеча, 19 февраль куни Трамп ушбу тармоқдаги ўз аккаунтида Зеленский ҳақида кескин фикр билдириб, уни диктатор деб атаганди. У, шунингдек, Украина Президентининг рейтинги пастлигини таъкидлаган. Трампнинг фикрича, Зеленскийнинг ягона истеъдоди “скрипка чалгандек” собиқ АҚШ президенти Жо Байденни ҳарбий мақсадлар учун 350 миллиард доллар ажратишга кўндириш бўлган.

Трамп шунингдек, Украина Президенти Россия билан қарама-қаршиликда устунлик қозона олмаслигига ишонч билдирган. Оқ уй раҳбари Зеленский илгари комедия жанридаги актёр сифатида “камтарона муваффақият”га эришганини эслатган, бироқ, шунга қарамай, унинг АҚШдан катта миқдорда ҳарбий ёрдам олишга муваффақ бўлганини таъкидлаган.

Бунга жавобан Германия канцлери Олаф Шольц Дональд Трампнинг Владимир Зеленскийни диктатор деган даъвосини кескин рад этди. Германия канцлерига кўра, Зеленский Украинанинг қонуний давлат раҳбари саналади. Шунингдек, Шольц Украинага қарши урушни айнан Владимир Путин бошчилигидаги Россия бошлаганини эслатиб ўтган.