Ukraina Rossiya hududlariga dron hujumi uyushtirdi

Bugun, 17 iyulga o‘tar kechasi Ukraina Qurolli kuchlari Rossiyaga yangi yirik dron zarbasini berdi. Bu haqda Rossiya Mudofaa vazirligi xabar berdi.

Ma’lum qilinishicha, 11 ta hudud va anneksiya qilingan Qrimda 122 ta statsionar uchuvchisiz samolyotlar, jumladan, Bryansk viloyatida 43 ta, Kursk viloyatida 38 ta uchuvchisiz uchish apparati yo‘q qilingan.

Ukraina hujumi oqibatida bir kishi halok bo‘ldi, yana kamida yetti kishi yaralangan. Belgorod viloyatida Grayvoronskiy tumanidagi Smorodino qishlog‘ida xususiy uyga drondan portlovchi moslama tushishi oqibatida bir ayol halok bo‘lgan, Korocha tumanidagi Pritsepilovka qishlog‘ida ikki nafar tinch aholi yaralangan.

Voronejda dron parchalari ko‘p qavatli uyga kelib urilgan, oqibatda uch nafar voyaga yetmagan bola jarohatlangan, ulardan ikki nafari shifoxonaga yotqizilgan.

Voronej viloyati gubernatori Aleksandr Gusevning ma’lum qilishicha, Voronej osmonida va shahar atrofida kamida beshta dron urib tushirilgan. 

Bu Voronejga bir hafta ichida ikkinchi dron hujumidir. Shahar meri Sergey Petrin 15 iyul kuni Sentralniy va Kominternovskiy tumanlarida hujum oqibatida yuzdan ortiq xonadon, yettita uy va bir xo‘jalik binosi, shuningdek, 14 ta mashina zarar ko‘rganini ma’lum qilgandi. 27 kishi jabrlangan, ulardan biri komaga tushib qolgan va keyinchalik shifoxonada vafot etgan.

Smolensk viloyati gubernatori Vasiliy Anoxin ham tungi hujum paytida qurbonlar haqida ma’lum qildi.

“Kaluga viloyatida 14 yoshli qiz uchuvchisiz samolyotning qulashi oqibatida yaralangan”, deb xabar berdi gubernator Vladislav Shapsha.

Ukraina qurolli kuchlarining Leningrad viloyatidagi hujumi fonida Pulkovo aeroporti faoliyatini to‘xtatdi. Cheklovlar Moskva vaqti bilan 5:00 atrofida joriy qilingan. Federal havo transporti agentligining xabar berishicha, aeroport Moskva vaqti bilan soat 7:15 da reyslarni qabul qilish va jo‘natishni qayta boshlagan.

Cheklovlar davrida Sankt-Peterburgga uchayotgan ikkita samolyot zaxira aerodromiga jo‘natildi. Moskva meri Sergey Sobyanin poytaxtga yo‘l olgan uchta dronning hujumini qaytarganini ma’lum qildi.