Украина “камикадзе”ларни Путинга бергани учун Эронга жавоб қилмоқчи

Украина Ташқи ишлар вазири Дмитрий Кулеба Эрон билан дипломатик муносабатларни тўхтатиш бўйича таклифни Президент Владимир Зеленский кўриб чиқиши учун тақдим этиш ниятида. Бу ҳақда унинг ўзи бугун, 18 октябрь куни Киевдаги брифингда маълум қилди. 

“Эрон учувчисиз учоқларининг Украина фуқаролик инфратузилмасига етказган улкан вайронагарчиликлари, халқимиз бошига тушган ўлим ва азоб-уқубатларни ҳамда Эрон Россияга қурол-яроғ етказиб беришда давом этиши мумкинлиги ҳақидаги хабарлар пайдо бўлишини инобатга олиб, мен Украина Президентига Эрон билан дипломатик муносабатларни тўхтатиш бўйича таклиф киритаман”, дейди Кулеба. 

Вазирнинг таъкидлашича, Украина ҳеч қачон Эронга қарши позицияни эгалламаган, бироқ Эрон Россиянинг тажовузкорлиги ва жиноятларига шерик бўлганидан кейин Киев жуда аниқ ва ҳалол позицияни тутди. 

Унинг сўзларига кўра, агар Эрон Россияга қурол етказиб беришни тўхтатса, у ҳолда Киев бутун муносабатлар мажмуасини қайта тиклашни муҳокама қилишга тайёр бўлади. 

Кулеба Эроннинг хатти-ҳаракатларини Украина “тоқат қилмайдиган бемаънилик ва ёлғон” деб атади. 

Унинг таъкидлашича, Теҳрон Украина билан муносабатларнинг бузилиши учун тўлиқ жавобгарликни ўз зиммасига олади. 

Айни пайтда, 18 октябрь куни Олий Радага Эрон билан дипломатик муносабатларни тўхтатиш ҳақидаги резолюция лойиҳаси юборилгани маълум бўлди.

Эслатиб ўтамиз, кеча 17 октябрь куни Украина ҳудуди бўйлаб Киевга уюштирилган дронлар ҳужумлари ҳамда Днепр ва Суми вилоятларига ракета зарбаларидан сўнг ҳаво огоҳлантириши эълон қилинди. Украина пойтахтида ҳаво ҳужуми 3 соат 8 дақиқа давом этди, янги зарбалар соат 9:31 да берилди. Эрта тонгда сигнал қабул қилингани сабабли, душанба куни Киевдаги барча таълим муассасалари масофавий иш режимига ўтказилди.

Украина ва АҚШга кўра, ушбу дронлар Эроннинг "камикадзе" дронлари бўлиб, Теҳрон БМТ санкцияларини бузиб, Россияга портловчи, учувчисиз самолётлар етказиб бермоқда.