Украина дунёдаги биринчи денгиз дронлари флотини тузади

Украина ҳарбий-денгиз дронлари флотини яратмоқда. Бу ҳақда бугун, 30 сентябрь куни мамлакат Президенти Владимир Зеленский Киевдаги биринчи Мудофаа саноати форумида маълум қилди.

“Биз дунёда биринчи бўлиб денгиз дронлари флотини яратмоқдамиз. Биз НАТО калибридаги қурол ва снарядларни ишлаб чиқаришни бошладик”, деган Украина раҳбари.

Унинг таъкидлашича, дунё саноати етакчилари билан биргаликда Украинада мудофаа ишлаб чиқаришни ривожлантириш Киев учун устувор вазифадир. 

Украина томони АҚШ, Буюк Британия, Германия, Франция, Туркия, Швеция ва Чехия мудофаа компаниялари ва ассоциациялари вакиллари билан ҳамкорлик ва қуролларни биргаликда ишлаб чиқариш истиқболларини муҳокама қилган. 

Украина ТИВнинг маълум қилишича, Мудофаа саноати форумида 30 мамлакатдан 252 мудофаа компанияси иштирок этган.

Эслатиб ўтамиз, мазкур форум давомида Зеленский Мудофаа саноати халқаро альянси ташкил этилишини эълон қилганди, унинг аъзолари Украина ҳудудида қурол ишлаб чиқаради. Мудофаа саноати альянсини тузиш тўғрисидаги декларация 9 давлатдан 38 та қурол ишлаб чиқарувчи компания томонидан имзоланди.