Украина Америка дронларини Хитойники билан алмаштирди – WSJ

Америкада ишлаб чиқарилган дронлар Россияга қарши урушда самарасизлигини исботлади. Бу Украинани Хитойдан дронлар ва улар учун эҳтиёт қисмлар сотиб олишни бошлашга мажбур қилди. Бу ҳақда “The Wall Street Journal” хабар берди.

Нашр келтирган PitchBook маълумотларига кўра, сўнгги икки йил ичида АҚШнинг 300 га яқин дрон компаниялари жами 2,5 миллиард долларга яқин венчур капитал тўплаган. Бироқ улар ишлаб чиқарган дронларнинг аксарияти Россия армиясига қарши жангларда яроқсиз бўлиб чиқди.

Украина Қуролли кучлари Америка дронларидан фойдаланишда дуч келган асосий муаммо бу уларнинг Россиянинг GPS технологиясини енгиб чиқа олмаслигидир. Бундан ташқари, қурилмалар кўпинча ҳавога кўтарилиш ёки базага қайтиш, шунингдек, белгиланган масофаларни босиб ўтиш ёки юкларни ташиш имконига эга эмас эди.

“Силикон водийсидан Skydio Украинага ўзининг бир неча юзлаб энг яхши дронларини жўнатди. Бироқ, уларнинг аксарияти йўлдан адашиб қолди. Компаниянинг ўзи унинг дронлари олдинги линияда унчалик муваффақиятли бўлмаганини тан олди ва янги флотни ишлаб чиқишни эълон қилди”, деб ёзади WSJ.

Бир нечта дрон стартаплари раҳбарлари компаниялар Украинада электрон уруш ривожланишини кутмаганини билдирди. Баъзи дронлар, шу жумладан Skydio дронлари ҳам бир неча йиллар олдин АҚШ армияси томонидан ўрнатилган алоқа стандартларига жавоб берадиган тарзда ишлаб чиқилган. Украина Рақамли трансформация вазири ўринбосари Георгий Дубинскийнинг сўзларига кўра, дронлар ҳар куни янгиланиб туришни талаб қилади.

“Бугун учаётган нарса эртага уча олмайди. Биз тезда янги технологияларга мослашишимиз керак. Бу урушда инновациялар даври жуда қисқа”, дейди у. 

Дубинскийнинг қўшимча қилишича, Украина кўпроқ Америка дронларини синаб кўриш ва улардан фойдаланишни хоҳлайди, бироқ айни пайтда бошқа тежамкор ечимларни қидирмоқда.

Бир нечта дрон ишлаб чиқарувчилар, жумладан Skydio янгиланган электрон уруш тизимларига эга янги дронларни ишлаб чиқишни аллақачон эълон қилди. Skydio янги қурилмаси АҚШ Мудофаа вазирлиги талабларини эмас, балки Киевнинг ҳарбий эҳтиёжларини ҳисобга олишини айтди. Украина минглаб янги Skydio Х10-ларни сўради, улар сигнали электрон шовқин билан блокланганидан кейин частоталарни ўзи ўзгартира оладиган радиога эга. Skydio вакилининг сўзларига кўра, дроннинг навигация имкониятлари яхшиланган, шунинг учун у GPS'сиз юқори баландликларда уча олади.

“Америка дронлари билан боғлиқ муаммолар, уларнинг қимматлиги ва таъмирлашдаги қийинчиликлар фонида Украина Хитойдан ўн минглаб дронлар ва улар учун эҳтиёт қисмларни олиш йўлини топди. Гап биринчи навбатда SZ DJI Technology қурилмалари ҳақида бормоқда”, дея қайд этади WSJ.

Хитойнинг DJI компанияси ўзини Украина армиясида машҳур дрон бренди сифатида кўрсатди. Бироқ компания бундан афсусда эканини билдирди. 

"DJI ўз маҳсулотларидан дунёнинг исталган нуқтасига зарар етказиш учун фойдаланишидан мутлақо афсусда ва буни қоралайди", дейди компания вакили.

Маълумотларга кўра, Украина ўзининг дрон ишлаб чиқариш саноатини яратган ва унда Хитой компонентлари ҳам қўлланилади. WSJ'нинг ёзишича, Украина Қуролли кучлари ҳар ойда 10 мингга яқин дронларни йўқотади. Украина армияси ҳар бири Хитойникидан ўн минглаб долларга қимматроқ бўлган Америка дронларини сотиб олишга тўғри келса, бунга қурби етмасди.