Украина АҚШ ёрдамининг тўхташига тайёргарлик кўрмоқда – “Bild”

Киев АҚШнинг Украинага кўрсатаётган ёрдамидан воз кечиш эҳтимолига тайёргарлик кўрмоқда. Бу ҳақда Украина ҳукуматидаги манбага таяниб, “Bild” нашри хабар берди.

“Биз энг ёмон сценарийга тайёрланяпмиз. Яъни АҚШ томонидан ёрдамнинг тўхтатилишига”, дейди манба.

Манбанинг сўзларига кўра, Украинада Вашингтон томонидан таклиф этилаётган тинчлик режаси ҳамда АҚШ Президенти Дональд Трампнинг Россия Президенти Владимир Путинга нисбатан босим ўтказмаслиги, янги санкциялар жорий этишга ҳам қизиқмаслиги борасида норозилик тобора кучаймоқда.

“Биз бу фақат унинг савдолашув услуби деб умид қилгандик. Аммо у Путинга босим ўтказмаяпти, санкциялар киритмаяпти, ҳатто тинч аҳоли нишонга олинган шафқатсиз ҳужумларга нисбатан очиқ норозилик ҳам билдирмаяпти”, дейди манба.

“Bild” билан суҳбатлашган расмий АҚШ томонидан таклиф этилаётган тинчлик шартлари Украинанинг манфаатларига мутлақо зид эканини таъкидлаган.

“Қоғозда ёзилган нарса ва музокараларда бизга ишора қилинаётган гаплар биз учун мутлақо қабул қилиб бўлмайдиган ҳолат. Биз шунчаки таслим бўлмаймиз. Ҳатто агар ҳукумат бунга тайёр бўлса ҳам. Бу ҳақиқатга тўғри келмайди – халқ бунга қарши чиқади”, деди расмий “Bild”га берган изоҳида.

Нашрнинг ёзишича, Украина ҳозирда АҚШ шартларини қайта кўриб чиқишга эришишга уринмоқда. Бунда Европа етакчилари билан маслаҳатлашувлар олиб борилмоқда. Хусусан, Украина Президенти Владимир Зеленский жорий йилнинг 26 апрель куни марҳум Рим папаси Франциск билан видолашув маросимида Дональд Трамп билан учрашиши мумкин.

Эслатиб ўтамиз, аввалроқ Украина Президенти Владимир Зеленский Буюк Британия пойтахти Лондонда Украина, Европа мамлакатлари ва АҚШ вакиллари ўртасида урушни тугатишга оид янги таклифлар тақдим этилгани ва бу таклифлар аллақачон Трампнинг столида эканини айтганди.