Украина ҳам Россияга зарба берди. Қурбонлар бор (видео)

Украина томонидан Россиянинг ғарбий ҳудудларига уюштирилган дрон ҳужумлари оқибатида камида икки киши ҳалок бўлди. Шунингдек, бир нечта саноат объектларига зарар етди. Бу ҳақда “The Moscow Times” хабар берди.

Қайд этилишича, Белгород шаҳрига уюштирилган ҳужум вақтида снаряд парчалари теккан автомобилда бўлган бир аёл олган жароҳатлари оқибатида вафот этган. Шаҳар мэри Валентин Демидовнинг билдиришича, ҳужум оқибатида Белгородда электр ва сув таъминотида ҳам узилишлар кузатилган.

Шунингдек, Украина Белгород ва унинг атрофини ракеталар билан нишонга олиши туфайли саноат объектларидан бирида ёнғин юзага келган.

Қўшни Брянск вилоятида эса камикадзе дрони ҳужуми оқибатида бир эркак ҳалок бўлган. Вилоятнинг вақтинча губернатори Егор Ковальчукнинг маълум қилишича, ҳодиса қишлоқлардан бирида содир бўлган.

Бундан ташқари, Смоленск вилоятидаги саноат объектларидан бирида ҳам дрон ҳужуми ортидан ёнғин чиққан. Вилоят губернатори Василий Анохиннинг маълум қилишича, ушбу ҳодисада жабрланганлар қайд этилмаган.

Эслатиб ўтамиз, кеча, 2 июль куни Россия Украинанинг пойтахти Киевга ракета ва дронлар билан кенг кўламли ҳужум уюштирган эди.