UEFA, ОФК ва CONCACAF FIFA’сиз ЖЧни ўтказиш ғоясини муҳокама қилмоқда

Агар FIFA президенти Жанни Инфантино лавозимида қолса, UEFA, ОФК ва CONCACAF муқобил халқаро турнирларни ташкил этиши мумкин. Бу ҳақда “The Times” нашри хабар берди.

Манбага кўра, уч конфедерация раҳбарлари Инфантинога нисбатан ишончни йўқотган ва унинг 2027 йил март ойида бўлиб ўтадиган президентлик сайловида тўртинчи муддатга номзодини қўйишига қарши бир қатор стратегияларни ишлаб чиққан.

Хабарда айтилишича, агар Инфантино ўз лавозимида қолса, UEFA, ОФК ва CONCACAF FIFA’дан мустақил равишда муқобил мусобақалар ўтказишга тайёр. Шунингдек, улар FIFA Кенгаши йиғилишларини бойкот қилиши ва ташкилот қарорларини тасдиқлашдан бош тортиши ҳам мумкин.

Эслатиб ўтамиз, Инфантино аввалроқ Жаҳон чемпионати тижорий ҳуқуқларининг бир қисмини хусусий инвесторларга сотиш ғоясини илгари сурган эди.

Инфантино ушбу ташаббус аъзо ассоциациялар даромадини ошириши ва жаҳон футболи ривожига хизмат қилишини таъкидлаган. FIFA’нинг ҳисоб-китобига кўра, лойиҳа 4,2 миллиард доллар маблағ жалб қилиши мумкин эди. Бироқ, ушбу ташаббус турли федерациялар ва футбол ташкилотлари томонидан кескин танқид қилинди.

Шунингдек, журналист Ромен Молина Инфантинога ташкилот ичидаги қўллаб-қувватлов пасайгани ва у яқин вақт ичида истеъфога чиқиши мумкинлигини маълум қилган.

Маълумот учун, 56 ёшли Жанни Инфантино 2016 йил февраль ойида бўлиб ўтган FIFA’нинг навбатдан ташқари конгрессида президент этиб сайланган. У кейинчалик яна икки марта рақобатсиз қайта сайланган. FIFA президентлиги учун навбатдаги сайлов 2027 йилнинг март ойида ўтказилиши режалаштирилган.