UEFA Инфантинони қаматмоқчи

Европа футбол иттифоқи (UEFA) FIFA турнирининг айрим тижорат ҳуқуқларини хусусий инвесторларга ўтказиш режаси юзасидан FIFA президенти Жанни Инфантинога қарши Швейцария судига жиноий шикоят аризаси беришга тайёрланмоқда. Агар у айбдор деб топилса, беш йилгача озодликдан маҳрум қилиниши мумкин. Бу ҳақда “Reuters” хабар берди.

Германиянинг SID спорт янгиликлари агентлиги таҳририят ихтиёрига келиб тушган 60 саҳифали ҳужжатга кўра, эҳтимолий суд жараёни FIFA томонидан кейинчалик рад этилган режа билан боғлиқ.

Ушбу режага кўра, FIFA’нинг футбол турнирлари, жумладан, Жаҳон чемпионатларига оид тижорат ҳуқуқларининг бир қисмини хусусий инвесторларга ўтказиш кўзда тутган.

Маълум қилинишича, UEFA ва бошқа манфаатдор томонлар Швейцарияда Жанни Инфантино, шунингдек, эҳтимол бошқа FIFA расмийлари ва маслаҳатчиларига қарши жиноий иш қўзғатиш имкониятини кўриб чиқмоқда.

Улар Инфантино Швейцария Жиноят кодексининг 158-моддаси, яъни ишонч билдирилган бошқарув ваколатларини суиистеъмол қилиш бўйича жавобгарликка тортилиши мумкинлигини таъкидламоқда.

Агар Инфантино FIFA манфаатларига қасддан зарар етказгани исботланса, у беш йилгача озодликдан маҳрум қилиниши мумкин.

UEFA АҚШ судларидан зарур ҳужжатларни, жумладан, FIFA ва Инфантино режасининг асосий инвестори сифатида тилга олинган Thrive Capital инвестиция компаниясига оид маълумотларни тақдим этишни сўраган.

Маълумотларга кўра, мазкур ҳужжатлар Швейцарияда эҳтимолий жиноий иш доирасида далил сифатида қўлланилиши мумкин.

“Коммерсантъ” газетаси хабарига кўра, Thrive Capital компанияси АҚШ Президенти Дональд Трампнинг куёви Жаред Кушнернинг укаси Жошуа Кушнерга тегишли.