“Уч қаҳрамон” ёнди: фожиадан кейин аҳвол қандай?

Бугун, 11 август куни Тошкент вилоятининг Тошкент туманида жойлашган “Уч қаҳрамон” бозорида ёнғин содир бўлди. Бу ҳақда Фавқулодда вазиятлар вазирлиги хабар берди. QALAMPIR.UZ тафсилотларни ўрганиш учун воқеа жойига борди.

Билдирилишича, соат 02:22 да ёнғин ҳақида вилоят ФВБга хабар келиб тушган.

Фавқулодда хабар ортидан ёнғин-қутқарув экипажлари соат 02:29 да воқеа жойига етиб бориб, ёнғинни ўчириш ишларига киришган. Ёнғинни бартараф этишга жами 10 та ёнғин-қутқарув экипажи жалб этилган.

Ёнғиндан кейинги тутунга бурканган бозорни кўздан кечирар эканмиз, ёниб кетган ит жасадига кўзимиз тушди. Айтишларича, бу бозор қоровулининг ити бўлган ва ёнғиндан қочиб чиқиб кета олмаган.

Ёниб кетган бозор четида гуруҳ-гуруҳ бўлиб турган тадбиркор, савдогар ва воқеа гувоҳлари ёнғин бир пайтда бозорнинг турли бурчакларида пайдо бўлгани ва бу уюштирилган бўлиши мумкинлигини айтди. Аммо биз микрофон тутганимизда гапиришдан бош тортиб, бунинг фойдаси йўқлигини айтди.