U-20 Жаҳон чемпионатида ярим финалчилар аниқланди

Бугун, 13 октябрга ўтар кечаси Чили мезбонлигидаги 2025 йилги футбол бўйича U-20 Жаҳон чемпионатининг чорак финал босқичи якунланди. Натижада турнирнинг ярим финалига йўл олган тўрт жамоа номи маълум бўлди.

U-20 Жаҳон чемпионати ярим финал босқичида қуйидаги жуфтликлар тўқнаш келади:

• Франция – Марокаш
• Аргентина – Колумбия

Ярим финал учрашувларининг ҳар иккиси жорий йилнинг 15 октябрь куни Вальпараисо шаҳрида бўлиб ўтади. Учинчи ўрин учун баҳс 18 октябрда, финал учрашуви эса 19 октябрь куни Сантьягодаги “Миллий” стадионда ўтказилиши белгиланган.

Аргентинанинг U-20 жамоаси бу турнир тарихидаги энг муваффақиятли жамоалардан бири саналади. Улар ҳозиргача 6 марта жаҳон чемпиони бўлишга муваффақ бўлган. Аргентина кичик мундиалда охирги бор 2007 йилда ғалаба қозонган.

Франция U-20 чемпионатида бир марта, 2013 йилда чемпионликни қўлга киритган. Колумбия ва Марокаш эса илк бор чемпионлик учун курашмоқда. Айниқса, Марокаш 2005 йилдан бери илк бор турнирнинг ярим финал босқичига чиқишга муваффақ бўлди.

Маълумот учун, мусобақанинг амалдаги чемпиони Уругвай терма жамоаси ҳисобланади. Уругвай 2023 йилда Аргентинада бўлиб ўтган U-20 Жаҳон чемпионатида финалда Италия терма жамоасини мағлуб этиб, чемпионликни қўлга киритган эди.