Туркиядаги воқеалар Европа таъсиридир – Алишер Қодиров

Олий Мажлис Қонунчилик палатаси депутати, “Миллий тикланиш” демократик партияси фракциясининг раҳбари Алишер Қодиров Туркияда юз бераётган воқеалар олдиндан режалаштирилганини айтди. Бу ҳақда у ўзининг Telegram-каналида ёзиб қолдирди.

У Туркиядаги тартибсизликларда бир гуруҳ ёшлар маст ҳолатда, Истанбулдаги қадимий Шаҳзодабоши жоме масжиди деворларига ҳожат қилиб, тарихий қабрларни бузиб ташланганига эътибор қаратиш кераклигини тилга олган.

“Бу тоифа, ўзлигига нафрат билан улғайган қатлам осмондан тушиб қолмаган, тизимли, узоққа мўлжалланган, жамиятларни ичидан бузиш ва вассаллаштиришни мақсад қилган глобал кучларнинг юз йиллардан бери олиб бораётган ишларининг натижасидир”, дея ёзган Қодиров.

Унинг қўшимча қилишича, Туркияда бу ишлар аввалдан, Европа мактабларида таълим олишдан бошланган.

“1924 йилда Туркия Республикаси қурилганида Европа давлатларидан илм оламиз деб Европа мактабларига кенг эркинликлар берилган. Бу мактаблар илм берган, бунга шубҳам йўқ, лекин ўзлигидан нафрат этадиган сезиларли катта қатлам ҳам яратишга эришган. Ўз миллати ва қадриятларидан нафрат этадиган ёшлар, ўша мактабларни тугатган авлодларнинг невараларидир”, дея ишонч билан ёзади “Миллий тикланиш” демократик партияси фракцияси раҳбари.

Шу билан бирга, депутат Ўзбекистонда ҳам тарбия масаласига алоҳида эътибор қаратиш кераклигини қўшимча қилган.

“Бизда ҳосил йўқ, лекин “дарахтлари” экилмоқда. Болаларимизга, албатта, энг замонавий билим беришимиз шарт, билим дунёнинг қаерида бўлса ҳам билимдир ва олиниши керак, лекин тарбияда миллий талабларимизни кескин белгилаб, татбиқида муросасиз бўлмасак, келажакда бошимиз ўзимиздан чиқадиган балолар билан оғриши мумкин”, дея ўз постини якунлаган Қодиров.

Эслатиб ўтамиз, аввалроқ Алишер Қодиров Россиянинг Украинага тажовузкор босқинчилиги ўзини оқлаши ҳам мумкинлигини айтганди. Унинг сўзларига кўра, Россиянинг Украинага тажовузкор босқинчилиги Евросиёни АҚШдан узиб олиш ва қитъани зўравонликлардан ҳоли, тенгликка таянган коллектив келишувлар асосида биргаликда тараққиёт йўлига олиб келса, ўзини оқлаши ҳам мумкин.