Туркияда ўзбекистонлик энага болани беаёв калтаклади (видео)

Жорий йилнинг 25 апрель куни Истанбулнинг Фотиҳ туманида ўзбекистонлик тарбиячи ўз уйида 2 ёшли болага энагалик қилаётган вақтида уни беаёв калтаклади. Бу ҳақда “Hurriyet” хабар берди.

Маълум қилинишича, ҳодиса туманнинг Нишанжа маҳалласида содир бўлган. Ўзбекистонлик энага бошқа бир ўзбекистонлик фуқароларнинг боласига қараб турган. У болага қарийб 2 ойдан бери ўз уйида энагалик қилиб келган.

Энага болани калтаклаётган вақтда уйда бўлган бошқа бир шахс унинг йиғлаётган болани ургани ва тепганини мобил телефон камерасига ёзиб олиб, полицияга хабар берган. Уйга келган гуруҳлар энагани қўлга олган.

Шунингдек, махсус гуруҳлар уйдан 7 нафар болани топиб, болаларнинг 2 нафари васийнинг, қолган 5 нафари қўшниларнинг фарзанди эканини аниқлаган. Гумонланувчи полиция бўлимидаги процедуралардан сўнг суд биносига юборилган.

Эслатиб ўтамиз, аввалроқ Тошкент шаҳрида хонадон эгасининг пулларини ўғирлаб, чақалоққа онаси йўқлигидан фойдаланиб, турли хил жароҳатлар етказган энагага суд ҳукми ўқилган эди.