Туркия, Украина ва БМТ Россиясиз дон ташиш режасини тасдиқлади

Бирлашган Миллатлар Ташкилоти, Туркия ва Украина делегациялари бугун, 31 октябрь куни денгиз гуманитар йўлак бўйлаб 14 та ўрнига 16 та кеманинг ҳаракатланиши жадвалини тасдиқлади. Бу ҳақда кеча, 30 октябрь куни дунё ташкилотининг Истанбулда жойлашган Қўшма мувофиқлаштирувчи марказдаги (ҚММ) ваколатхонаси томонидан тарқатилган қайта кўриб чиқилган маълумотларда айтилади, деб ёзмоқда ТАСС,

Юқорида тилга олинган делегациялар “эртага, 31 октябрь куни денгиз гуманитар йўлаги бўйлаб 16 та, жумладан, 12 тасининг Украина портларидан чиқиш ва тўрттаси Украина портларига ҳаракатланиш режасини келишиб олган”. Бу қарор ҳақида БМТ томонидан Россия томони хабардор қилинган.

Шу билан бирга, ҚММ олтита кема Украина портларидан ҳаракатлана бошлаганини, аммо гуманитар коридорга ҳали чиқмаганини таъкидлади. Умуман олганда, умумий оғирлиги тахминан 700 минг тонна бўлган озиқ-овқат юки бўлган 21 та кема Украина портлари ва унга туташ сувларда ҳаракатланиш учун рухсат кутмоқда.

Эслатиб ўтамиз, жорий йилнинг 29 октябрь куни Россия Мудофаа вазирлиги аннексия қилинган Севастополдаги Қора денгиз ҳарбий флотига уюштирилган ҳужум муносабати билан Украинадан озиқ-овқат маҳсулотларини экспорт қилишга мўлжалланган келишувдаги фаолиятини тўхтатишини маълум қилган эди. Шунингдек, расмий Москва кемалар хавфсизлигига жавоб бермаслигини таъкидлаган.

Маълумот учун, 22 июль куни Истанбулда Туркия Президенти Ражаб Тойиб Эрдўған ва БМТ Бош котиби Антониу Гутерриш иштирокида Украина портларидан ғаллани хавфсиз ташиш бўйича келишув имзоланди. Ҳужжатни Украина, Россия, БМТ ва Туркия вакиллари имзолади. Дон шартномаси Украинанинг Одесса, Южний ва Черноморск портларини ўз ичига олади.

Шартнома муддати 19 ноябрда тугайди. Бирлашган Миллатлар Ташкилоти ва Туркия аввалроқ келишувни узайтиришга чақирган эди.

Октябрь ойида Қрим кўпригида портлаш бўлиши ортидан Россия Президенти Владимир Путин дон келишуви тўхтатиб қўйилиши мумкинлигини айтганди. У портловчи ускуна дон йўлаги орқали Қримга олиб келингани тасдиқланса, шундай қилинишини айтди.