Туркия ПКК тарафдорларини қуролларни ташлашга чақирмоқда

north_east

Эрдўған БМТда мусулмонлар ҳуқуқлари ҳимоясини талаб қиляпти

Туркия Миллатчи Ҳаракат партияси (МҲП) раиси Давлат Бахчели Курдистон Ишчи партияси (ПКК) Туркия билан зудлик билан ўт очишни тўхтатганини эълон қилганидан сўнг, Курдистон Ишчилар партиясига алоқадор гуруҳларни зўравонликдан воз кечишга чақирди. Бу ҳақда кеча, 9 март куни AFP хабар берди.

“YPG (Курд халқ ҳимояси бўлинмалари) ва шунга ўхшаш террор ташкилотларининг бу даъватнинг уларга тегишли эмаслигини даъво қилиши ташкилот раҳбариятига мутлақо зиддир”, дейди Давлат Бахчели .

Тақиқланган Курдистон Ишчи партияси (ПКК) Туркия қамоқхонасида сақланаётган ПКК етакчиси Абдулла Ўжаланнинг тинчликка чақириғи ортидан 1 март куни Туркия билан зудлик билан ўт очишни тўхтатишни эълон қилди. ПКК қуролсизланишнинг фақат Ўжалан раҳбарлигида бўлиши мумкинлигини таъкидлаб, унинг озод этилишига умид билдирди.

Бундан ташқари, ташкилот можарони муваффақиятли ҳал этиш учун сиёсий ва демократик шарт-шароитлар яратиш зарурлигини таъкидлади.

Ўз навбатида, Туркия ҳукумати ПКК билан музокаралар олиб бормаслигини таъкидлаб, Ироқ ва Суриядаги барча курд қуролли гуруҳлари қуролларини ташлашини талаб қилди.

Анқара ПККнинг бир шохобчаси деб ҳисоблаган Сурия Демократик Кучлари (СДК) Ўжаланнинг чақириғини олқишлади, аммо бу СДК жангчиларига тааллуқли эмаслигини таъкидлади.

Маълумот учун, 1999 йилдан бери Имрали оролидаги қамоқхонада деярли изоляцияда сақланаётган Абдулла Ўжалан 27 февраль куни тарихий баёнот бериб, тарафдорларини Туркия давлатига қарши 40 йилдан ортиқ давом этган курашдан сўнг қуролларини ташлаб, ПКК тарқатилганини эълон қилишга чақирди. Бу ҳаракат 40 мингдан ортиқ одамнинг ўлимига сабаб бўлган можарода тинчликка йўл очишга қаратилган эди.

Ўжаланнинг чақириғини Туркия Президенти Ражаб Тойиб Эрдўғаннинг миллий-консерватив ҳукумати ҳам, Ўжаланнинг воситачиси сифатида ишлаган курдпараст мухолифат партияси “Dem Parti” ҳам қўллаб-қувватлади.

Эрдўғаннинг иттифоқчиларидан бири 2024 йил октябрь ойида кутилмаганда Ўжаланни  ўт очишни тўхтатишга чақиришни таклиф қилганди. Шундан сўнг, “Dem Parti” вакиллари суд жараёнини муҳокама қилиш учун бир неча марта Ўжаланни кўргани қамоқхонага борди.