Туркия баллистик ракетани синовдан ўтказди (видео)

Туркиянинг муҳим мудофаа саноати лойиҳаларидан бири бўлган маҳаллий узоқ масофали баллистик ракета Tayfun учинчи синовини муваффақиятли якунлади. Бу ҳақда “Sabah” хабар берди.

Қайд этилишича, Ризе-Артвин аэропортидан учирилган ракета режалаштирилган нишонга теккан ва синов жараёнини муаммосиз якунлаган. Ракета парвози Қора денгиз томонга йўналтирилган. 

“Мудофаа саноати раислиги ва ROKETSAN ҳамкорлигида ишлаб чиқилган Tayfun баллистик ракета тизими синов отилиши билан кучини яна бир бор исботлади”, дейилади хабарда. 

Маълум қилинишича, Ризе-Артвин аэропортидан ишга тушириш чоғида атрофдаги ва аэропорт ичида кенг қамровли хавфсизлик чоралари кўрилган.

Ракетанинг учирилиши давомида неча километрга етиб боргани ҳақида маълумот берилмаган бўлса-да, синов жараёни муваффақиятли якунлангани маълум қилинган.

Хабарга кўра, Tayfun ракетаси аввал ҳам икки марта Ризе-Артвин аэропортидан муваффақиятли учирилган. Биринчи синов 2022 йил 18 октябрда ўтказилган бўлса, иккинчи синов 2023 йил 23 майда қайд этилган. Ушбу якуний синов лойиҳанинг бориши ва тизимнинг ишончлилигини яна бир бор намойиш этган.

Эслатиб ўтамиз, аввалроқ Туркиянинг Fergani Space компаниясининг биринчи сунъий йўлдоши коинотга учирилганди.