Трампнинг одами Зеленский ва Европа етакчилари билан учрашади

АҚШ Президенти Дональд Трампнинг махсус вакили Стив Уиткофф жорий ҳафтадаги дам олиш кунларида Берлинда Европа етакчилари ва Украина Президенти Владимир Зеленский билан учрашади. Бу ҳақда расмий шахсларга таяниб, “The Wall Street Journal” хабар берди.

Нашр маълумотига кўра, Уиткофф 14 ва 15 декабрь кунлари Буюк Британия, Германия ва Франциядаги ׅҳамкасблари билан ҳам музокаралар ўтказади.

15 декабрь куни Германия канцлери Фридрих Мерц Зеленскийни “Германия-Украина иқтисодий музокаралари ва Украина бўйича тинчлик музокараларининг ҳолати юзасидан фикр алмашиш” учун қабул қилади.

“Berliner Morgenpost” ёзишича, учрашувда Буюк Британия ва Франция вакиллари, шунингдек, эҳтимол Польша ва Италия ҳам иштирок этади.

WSJ қайд этишича, АҚШнинг Уиткоффни Германиядаги учрашувга юбориш ҳақидаги қарори Киев ва Вашингтон ўртасида тинчлик режаси шартлари бўйича мавжуд келишмовчиликларни камайтиришга интилаётганини кўрсатади.

Шу билан бирга, RMF FM радиоси 13 декабрь куни Парижда бўлиб ўтиши керак бўлган учрашув бекор қилингани ҳақида хабар берган. Унда Украина, Буюк Британия, Германия, Франция ва АҚШ вакиллари қатнашиши режалаштирилган эди. 

Нашр маълумотига кўра, мазкур учрашувда Украинадаги можарони тинч йўл билан ҳал этиш масалалари муҳокама қилиниши керак эди. Киев бу таклифларни 10 декабрь куни АҚШ томонига тақдим этилган Америка тинчлик режасига жавобида акс эттирган.

Бироқ АҚШ Президенти Дональд Трамп агар тинчлик келишувини тузиш учун яхши имконият бўлса, Вашингтон ушбу учрашувга ўз вакилини юборишини айтган. 13 декабрга ўтар кечаси у Украина бўйича можарони тартибга солиш жараёнида “катта силжиш” борлигини маълум қилган. 

Эслатиб ўтамиз, аввалроқ Оқ уй матбуот котиби Кэролайн Ливитт АҚШ Президенти Дональд Трамп Россиянинг ишларидан ҳам, Украинанинг ҳаракатидан ҳам жуда норози эканини айтганди. Ливиттга кўра, Трамп амалий чоралар кўрилмаётганидан жуда хафа ва у энди шунчаки суҳбатлар эмас, балки аниқ ҳаракатларни истаяпти.