Трампнинг одами яна Путин билан учрашди (видео)

Бугун, 25 апрель куни Россия Президенти Владимир Путин АҚШ Президенти Дональд Трампнинг махсус вакили Стив Уиткофф билан учрашди. Бу ҳақда Россия Президенти матбуот хизмати хабар берди.

Маълум қилинишича, икки давлат вакиллари ўртасидаги учрашув маҳаллий вақт билан 14:30 да бошланган ва у Кремлда бўлиб ўтмоқда.

Россия Президенти матбуот котиби Дмитрий Песковнинг билдиришича, бу уларнинг сўнгги икки ҳафта ичидаги иккинчи ва йил бошидан бери тўртинчи учрашуви саналади.

Музокараларда Россия Президенти ёрдамчиси Юрий Ушаков ва Россия тўғридан тўғри инвестициялар жамғармаси бош директори раҳбари Кирилл Дмитриев ҳам иштирок этмоқда.

Музокаралар мавзусини на Москва, на Вашингтон расман эълон қилган, аммо, катта эҳтимол билан гап Украина инқирозини ҳал қилиш ва Дональд Трамп таклиф қилган тинчлик режасини келишиш ҳақида кетмоқда.

Маълумот учун, Путин ва Трамп вакили ўртасидаги сўнгги учрашув жорий йилнинг 11 апрель куни Россия Президенти Владимир Путин Санкт-Петербургдаги президент кутубхонаси биносида бўлиб ўтган эди. Учрашув тўрт соатдан кўпроқ давом этган. Суҳбат ёпиқ эшиклар ортида бўлиб ўтган. Ушбу учрашувда ҳам асосий мавзу Украинадаги вазият эди.

Эслатиб ўтамиз, аввалроқ АҚШ Президентининг махсус вакили Стив Уиткоффнинг самолёти Россиянинг Внуково аэропортига қўнгани ҳақида хабар берилганди.