Трампнинг одами Мустақилликни Мирзиёев билан нишонлаш учун Тошкентга келди

АҚШнинг Глобал ҳамкорлик бўйича махсус вакили Паоло Замполли бугун, 28 август куни Ўзбекистонга келди. У мамлакат Ташқи ишлар вазири Бахтиёр Саидов билан мулоқот қилди. 

“Замполли жаноблари билан самарали учрашув ўтказдик. Биз мамлакатларимиз ўртасида янада мустаҳкам кўприклар қуриш – таълим ва маданиятдан тортиб, инновация ва бизнесгача фикр алмашдик. Халқларимизни янада яқинлаштириш учун катта, ҳали тўлиқ ишга солинмаган салоҳият мавжуд. 

Мулоқотларимиз давомида минтақавий ва глобал аҳамиятга эга бир қатор масалаларга ҳам тўхталдик – янада фаровон келажак учун ҳамкорликда ишлаш бўйича умумий қарашларимизни билдирдик”, дейди Саидов ўзининг Telegram-каналида.

Маълумот  учун, махсус вакил Замполли Президент Трампнинг Американинг глобал ҳамкорлигини мустаҳкамлаш борасидаги дадил ғояларини илгари сурмоқда. Унинг вазифаси аниқ – Америка ютуқларини тарғиб қилиш, Қўшма Штатларни дунёдаги энг буюк давлатга айлантирган қадриятларни олға суриш ҳамда АҚШ дипломатиясининг кучи ва салоҳиятини қўллаб-қувватлайдиган мустаҳкам алоқаларни ўрнатиш. Махсус вакил Замполли Американинг тенгсиз ижодкорлиги, дунёқараши ва етакчилигини намойиш этиш мақсадида Ўзбекистоннинг маданият арбоблари ва муассасалари билан янги алоқалар ўрнатишни интиқлик билан кутмоқда. 

Ушбу тарихий ташриф давомида Махсус вакил Замполли Президент Шавкат Мирзиёев билан бирга Ўзбекистоннинг Мустақиллик кунини нишонлаши кутилмоқда. У шунингдек, АҚШ элчиси Жонатан Хеник билан бирга Америка Қўшма Штатлари ва Америка қадриятларини ўрганиш учун ажойиб янги марказ бўлган “American Corner Tashkent”нинг тантанали очилиш маросимида иштирок этади.  Махсус вакил Замполли Ўзбекистоннинг Олимпия ўйинлари ғолиблари билан учрашади ва Ўзбекистон миллий футбол терма жамоасини 2026 йилги ФИФА Жаҳон чемпионатида иштирок этиш учун Америка Қўшма Штатларига ташриф буюришини қутлайди. 

“Бу йил Тошкентда ўтказиладиган Ўзбекистон Мустақиллик куни тантаналарида Америка Қўшма Штатларидан энг юқори даражадаги вакил бўлишидан мамнунмиз. Махсус вакил Замполлининг ташрифи ўзгармас ҳақиқатни яна бир бор тасдиқлайди: Қўшма Штатлар ўзаро ҳурмат, фаровонлик ва муваффақиятли келажакка содиқ бўлган ишончли ҳамкор сифатида Ўзбекистонга елкадошдир”, дейди Хеник.