Трампнинг одами Кремлни тарк этди

Аввалроқ, Россия Президенти Владимир Путин АҚШ Президенти Дональд Трампнинг махсус вакили Стив Уиткофф билан учрашгани ҳақида хабар берилган эди. Ушбу учрашув ўз якунига етди. Бу ҳақда РИА Новости хабар берди.

Маълум қилинишича, Трампнинг махсус вакили Стив Уиткофф Путин билан музокаралардан сўнг Кремлни тарк этган. Унинг кортежи Путин қароргоҳидан чиқиб кетган.

Музокараларда Россия Президенти ёрдамчиси Юрий Ушаков ва Россия тўғридан тўғри инвестициялар жамғармаси бош директори раҳбари Кирилл Дмитриев ҳам иштирок этган.

Матбуот учун ёпиқ бўлган учрашувнинг асосий мавзулари ошкор этилмаган, аммо томонлар катта эҳтимол билан Украина инқирозини ҳал қилиш ва Дональд Трамп таклиф қилган тинчлик режасини келишиш ҳақида гаплашган.

Маълумот учун, Путин ва Трамп вакили ўртасидаги бундан олдинги учрашув жорий йилнинг 11 апрель куни Россия Президенти Владимир Путин Санкт-Петербургдаги президент кутубхонаси биносида бўлиб ўтган эди. Учрашув тўрт соатдан кўпроқ давом этган. Суҳбат ёпиқ эшиклар ортида бўлиб ўтган. Ушбу учрашувда ҳам асосий мавзу Украинадаги вазият эди.