Трампнинг имзоси 100 долларлик банкноталарда пайдо бўлади

АҚШ Молия вазирлиги мамлакат мустақиллигининг 250 йиллиги муносабати билан доллар банкноталарига Президент Дональд Трампнинг имзосини жойлаштиришга қарор қилди – бу амалдаги давлат раҳбари учун биринчи ҳолат. Бу ҳақда вазирликка таяниб, “Reuters” хабар берди.

Қайд этилишича, янги имзо туширилган дастлабки 100 долларлик купюралар жорий йилнинг июнь ойида босиб чиқарила бошланади, кейинчалик бу ўзгариш бошқа банкноталарга ҳам татбиқ этилади. Шу билан бирга, 165 йил ичида биринчи марта АҚШ ғазначисининг имзоси олиб ташланади, пулнинг қолган дизайни эса ўзгаришсиз қолади.

Эслатиб ўтамиз, аввалроқ Трамп томонидан тайинланган АҚШ Санъат ишлари бўйича федерал комиссияси мамлакатнинг 250 йиллигига бағишланган, унинг тасвири туширилган эсталик олтин тангасини чиқаришни маъқуллаганди. 24 каратли олтиндан ясалган ушбу танга коллекция учун мўлжалланган бўлиб, муомала учун чиқарилмайди.

Ушбу қарор демократлар томонидан танқидларга сабаб бўлди. Жумладан, сенатор Жефф Меркли монархлар ва диктаторлар ўз суратларини тангаларга жойлаштиришини таъкидлади. Бироқ тарихан амалдаги президентларнинг тасвирлари эсталик тангаларида аввал ҳам учраб турган.