Трампнинг илтимосига қарамай, Россия Украинага яна зарба берди

АҚШ Президенти Дональд Трамп Россия Президенти Владимир Путин билан совуқ об-ҳаво сабаб Украинага ҳужум қилмаслик бўйича келишувга эришганини маълум қилганди. Бироқ ушбу оғзаки келишувга қарамай, бугун, 30 январь куни Россия Украина ҳудудига ҳужум уюштирди. Бу ҳақда “Deutsche Welle” хабар берди.

Қайд этилишича, 30 январь куни тонг пайтида Россия армияси Украина бўйлаб 111 та дрон ҳамда битта “Искандер-М” баллистик ракетаси ёрдамида кун давомида зарбалар берган.

Украина Фавқулодда вазиятлар давлат хизмати (СЧС) маълумотига кўра, Харьков шаҳри чеккасида жойлашган фуқаролик омбори биносига ракета зарбаси берилиши оқибатида кучли ёнғин келиб чиққан. Ёнғин 5 минг квадрат метрдан ортиқ майдонни қамраб олган бўлиб, уни ўчиришга 80 дан зиёд қутқарувчи жалб этилган.

Мазкур ҳужум Россия ва Украина инфратузилмасига зарбаларни вақтинча тўхтатиш бўйича келишувга эришилгани ҳақидаги хабарлар тарқалганидан бир неча соат ўтиб содир бўлган.

Москва АҚШ ва Россия етакчилари ўртасидаги мулоқотни тасдиқлади. Россия Президенти матбуот котиби Дмитрий Песковнинг билдиришича, Трамп шахсан Владимир Путиндан 1 февралга қадар Киевга ҳужум қилмасликни сўраган. Путин америкалик мавқедошининг илтимосига розилик билдирган. Бироқ Кремль вакили бу келишув фақат энергетика инфратузилмасига зарбаларни тўхтатишга тааллуқлими ёки барча ҳужумларни қамраб оладими, бу борада аниқлик киритишдан бош тортган.

Эслатиб ўтамиз, аввалроқ Трамп Путиндан кучли совуқ туфайли кейинги етти кун давомида Украинага ҳужум қилмасликни сўраганди. Путин бу илтимосга ижобий жавоб қайтарганди.